Vil rekruttera arbeidsfolk
Verksemdene i Hardanger har fleire hundre utlyste stillingar. Samstundes er arbeidsløysa låg.
Bedriftene er difor i ein særs pressa situasjon. Det vil næringsutviklarane gjera noko med gjennom prosjektet «Rekruttering i Hardanger», skriv Næringshagen i Ullensvang (NU) AS i ein e-post til Vestland fylkeskommune.
Rekrutteringsbehovet vil veksa dei næraste åra, då det i mange verksemder er ein ekstraordinært høg snittalder på dei tilsette. Kring 15 prosent av arbeidsstokken skal pensjonerast dei neste fem åra, ifylgje NU.
Næringshagane i Hardanger og Voss ynskjer å gjera verksemdene meir synlege i jobbmarknaden, auka samhandlinga mellom verksemdene for å sikra at gode kandidatar ikkje forsvinn, og gjera tiltak for å sikra arbeidsplassar for partnarar.
Mellom tiltaka er å knyta kontakt med utdanningsinstitusjonar i Bergen for å kopla studentar til Hardanger og Voss, slik at dei kan skriva oppgåver på bachelor- og masternivå og hospitera i verksemder i regionen. Ein vil elles fokusera på auka bulyst gjennom sosiale arrangement og pressa på for å få fleire bustader. Dessutan vil prosjektet utvikla kontorfellesskapar med auka bruk av fjernarbeid. Verksemder som treng hjelp til rekruttering, vil få tilbod om konsulenttenester.
«Rekruttering i Hardanger» vil verta leia av NU og ha aktørar frå næringslivet og kommunane i styringsgruppa. Samarbeidspartnarar i prosjektet er Hardanger og Voss Næringshage, Kvinnherad Næringsservice, Kvam herad, Ulvik herad, Ullensvang kommune, Voss herad, Eidfjord kommune, Framtidsfylket, Nav, Hardangerrådet og verksemder i regionen.
Budsjettet for prosjektet er på 2,5 millionar kroner over prosjektperioden på to år, frå 1. september 2023 til 1. september 2025. Vona er å få 1,3 millionar kroner frå fylkeskommunen, 260.000 kroner frå næringslivet og til saman 230.000 kroner frå kommunane Ullensvang og Kvam.
