Vil redda naturperle med festival
Naturvernforbundet Hardanger går nye vegar for å motarbeida planane om å byggja biogassanlegg i Tryglavik i Jondal.
Forbundet inviterer til ein eigen Tryglavik-festival. Den vert gjennomført laurdag 22. juni i og rundt Tryglavik.
– Sommaren er festivaltid. Dei andre festivalane i regionen er uforpliktande og lite politiske. Denne festivalen er eit motstykke til desse, seier Klaus Rasmussen, leiar i Naturvernforbundet Hardanger.
Naturvandring og musikk
Festivalen byr på ein gaida fottur til Gullbergnotten og skogvandring med botanikar. Sopp og andre vekstar skal studerast.
Det vert fire musikalske innslag. Stig Lundblad-Sandbakk og Steinar Karlsen skal spela gitar, medan Ingrid Standal Sørheim skal spela toradar og trekkspel. Programmet inneheld også ei musikalsk overrasking.
Ifølgje Rasmussen vert det appellar med ein profilert politikar og ein profilert miljøvernar. Det vert bading, padling og grilling. Dei som ønskjer det, kan overnatta i telt.
Rasmussen meiner at ikkje berre sjølve Tryglavik, men heile området rundt er naturperler.
– Skogen under Gullbergnotten er ein urørt eventyrskog. Det å vandra i den gjev ei heilt spesiell kjensle. Me har ikkje slik skog mange stader i Hardanger, seier han.
– Vil skapa engasjement
– Kva håpar de å oppnå med festivalen?
– Me ønskjer å syna fram kvalitetane i og rundt Tryglavik, og å skapa engasjement mot biogassplanane. Håpet er at engasjementet skal gjera at politikarane i Ullensvang tek til vit, seier Rasmussen.
Naturvernforbundet Hardanger er ikkje motstandar av biogassanlegg.
– Det er positivt å laga energi på denne måten, men det er heilt feil å plassera anlegget i eit urørt naturområde, seier Rasmussen.
– Vert det fleire festivalar i Tryglavik?
– Eg håpar ikkje det. Eg håpar me slepp. Her må politikarane bruka fornuft og ikkje dynamitt.
