Vil opna bruktbutikk: – Først og fremst ein møteplass
Jondal frivilligsentral vonar kjøp og sal av brukte varer vil lokka fleire til møteplassen Sentralen.
I august opnar frivilligsentralen dørene for bruktbutikken. Liv Bente Steiro, som i vår tok over som dagleg leiar i frivilligsentralen, vonar tilbodet vil vera eit godt supplement i bygda.
– Det skal først og fremst vera ein møteplass for alle. Mange menneske opplever einsemd, også i Jondal, og me har stor tru på at ein slik uformell møtestad vil verta godt motteke. Å vera frivillig og kunna delta i noko meiningsfullt, er viktig for oss alle, seier Steiro.
Møtestaden Sentralen vart etablert i fjor. Når ein ønsker å samla folk, er det greitt å ha noko å halda i fingrane, meiner Steiro. Staden skal ha sittegrupper, og gjestene kan nyta kaffi og vaflar, sjølv om dei ikkje vil handla. Terskelen skal vera låg, seier Steiro.
Miljø- og sosial vinst
Steiro meiner ein bruktbutikk vil vera eit positivt innslag i Jondal, både med tanke på miljøomsynet og det sosiale. Ho trur mange jondølingar sit på skattar som dei vil ha ut av huset, men ikkje vil kasta.
– Å kunna levera varer frå seg til ein stad som frivilligsentralen, og vita at dei kjem til nytte og skaper inntrykk, er positivt, seier ho.
Inntektene går til drift av Sentralen som møtestad og elles til aktivitetar i regi av frivilligsentralen.
– Overforbrukssamfunn
Truleg vil butikken vera open to–tre dagar i veka. Frivilligsentralen er no på jakt etter både varer og frivillige som er interesserte i å vera med og driva butikken.
Steiro seier at ho sjølv elskar bruktbutikkar og er ein røynd brukthandlar. Ho har dessutan drive nettbutikk med etiske og økologiske varer i mange år.
– Me lever i eit overforbrukssamfunn. Alt skal kjøpast nytt, og me har ikkje noko forhold til tinga me kjøper. Men viss me finn ein brukt skatt som har ei historie, kan han ha ei tyding som gjer at me tek betre vare på han. Gjenbruk er i tida som aldri før, og skapar engasjement hos både unge og eldre, seier ho.
