Vil montera ny sag – treng støtte

I ein søknad om stønad frå næringsfondet i Ullensvang kommune ber innehavar Bjarne Guntveit om 130.000 kroner. Målet er å få montert og kopla opp saga og utstyr som trengst, og byrja å saga tømmer på nyåret. Det er svært viktig for å nå den beste tørketida for materialar, som er frå mars til juni, skriv Guntveit.

Verksemda har spesialisert seg på leigeskjering av tømmer og sal av sjølvskorne materialar. Etter kvart som etterspurnaden har auka, har verksemda investert i utstyr og etablert seg på ein fast lokalitet, halvannan kilometer frå Jondal sentrum.

Planen var å nytta sagbruket og utstyret ein allereie hadde i den vidare produksjonen, men slik er ikkje stoda i dag.

– For å kunna driva rasjonelt, viste det seg raskt at det eksisterande utstyret var for lite effektivt, skriv Guntveit i søknaden.

Det førte til investeringa i ei ny sirkelsag. Stønaden frå næringsfondet skal eventuelt brukast til å kjøpa mellom anna tømmerinntak og sorteringsutstyr som ikkje fylgde med saga, men som er naudsynt for å drifta henne. Det nye utstyret vil betra effektiviteten og kvaliteten på produksjonen, meiner Guntveit. Sagutstyret og eit sorteringssystem vil redusera den manuelle handteringa, auka produksjonskapasiteten og betra tilhøva for arbeidarane, skriv han.

Søknaden syner eit mål om å etablera ein halv arbeidsplass i 2026, som vil utvikla seg til ei heiltidsstilling året etter. Jondal Sag vil ifylgje søknaden kunna bidra til lokal verdiskaping og styrkja den lokale skogbruksnæringa i Ullensvang.