Vil lokka studentar med stipend
Ei ny stipendordning skal hjelpa Kvam herad med å skaffa naudsynt kompetanse.
I desember vedtok heradsstyret å løyva éin million kroner til ei ny stipendordning. Stipenda skal gå til studentar som vil jobba i heradet, og til tilsette som ønskjer å vidareutdanna seg. Stipendordninga gjeld berre for fag innan helse og omsorg, og oppvekst.
Rådmannen har laga eit forslag til retningsliner for ordninga. Desse skal handsamast av Kvam administrasjonsutval 8. mars.
I forslaget står det mellom anna at heradet kan oppretta faste stillingar for studentar som vil kombinera studium med ei 50 prosent stilling i heradet. Stipendet vert på 30.000 kroner for kvart 60. studiepoeng.
Stipend til etter- og vidareutdanning skal gå til tilsette som ønskjer å utvida kompetansen i tråd med trongen til heradet. Stipendet vil vera på 3.000 kroner for kvart 3. studiepoeng, ifølgje framlegget
Dei som får stipend, må vera tilsette i heradet i ein periode etter at utdanninga er ferdig. Sluttar ein før bindingstida går ut, må delar av eller heile stipendet betalast attende. Dei som ikkje fullfører utdanninga, må betala stipendet attende.
