Vil lokka kinesarar til regionen
– Hardanger er som eit mini-Noreg, og har noko for folk i alle aldrar. Det er eit godt salspunkt.
Det seier Jason Weng. Han er ein av Innovasjon Noreg sine representantar i reiselivet i Kina. Dei siste dagane har han saumfare regionen saman med både turoperatørar, presse, fotografar, filmskaparar og influensarar på jakt etter gode motiv, historier og informasjon som skal lokka kinesarar til Hardanger.
Hardanger har Weng opplevd før – ofte nok til å vita at han har vore heldig med vêret, sjølv om det ikkje har vore strålande sol. Det er likevel fyrste gongen han vitjar fjorden på denne tida av året. Ein fjord som ifylgje han skil seg ut frå andre klassiske «turistfjordar».
Ikkje er det «berre» bratte fjellsider nedover langs fjorden, og ikkje er det veldig «turistifisert». At ein kan sjå folk og små samfunn på begge sider av fjorden, og sjå gardar og frukttre, er heilt spesielt, meiner den erfarne reiselivskaren. Hardanger er meir eit område å slå seg til ro i enn ein stad å reisa gjennom, meiner han.
Kjenner lukta av natur
Slike utsegner er truleg som musikk i øyra til Hege Vedvik. Ho er produktsjef i Visit Hardangerfjord AS, og har hatt ansvar for gruppa på 14 i fire dagar til ende. Laurdag morgon vart gjengen plukka opp i Bergen, og dei siste dagane har gruppa vore innom både sidergardar i Ulvik og Øystese, Botnen, Folgefonna, Vøringsfossen, Trolltunga og Hardanger fartøyvernsenter, for å nemna noko.
– Kinesarar er fulle av energi, så det er eit fullpakka program, seier Vedvik.
– Kva tilbakemeldingar har du fått?
– Deltakarane er heilt over seg av begeistring. Dei fleste er frå Beijing eller området rundt. Berre det å ha naturen så tett på er veldig stort, seier dei. Lukta av natur gjer dei lukkelege, fortel ho.
Av dei ulike besøka i regionen sette Trolltunga mest spor, trur Vedvik. Turistmagneten var det viktigaste for gjengen å få oppleva.
– Fått mykje gratis
Smørjeturen for kinesarane byrja ikkje i Hardanger. Gjengen starta 78 grader nord på Svalbard før dei vende sørover på Hurtigruta. Folk flest måtte ha spara i fleire år for å få råd til noko slikt, men for dette reisefylgjet var turen heilt gratis.
– Korleis vert dette finansiert?
– Det er litt delt. Me brukar medlemsverksemdene våre, som me har aktivitetar hjå. Dei er med og bidreg. Om noko må betalast, betalar Visit Hardangerfjord det. Men me har fått mykje gratis denne gongen, seier Vedvik.
Kva Visit Hardangerfjord får att for utgifta, er vanskeleg å måla, seier ho. I tillegg til mykje materiale i form av bilete og videoar er det von om flotte reportasjar og anna som kan lokka kinesarane til regionen.
– Så lærer me denne folkegruppa å kjenna, seier produktsjefen.
– Får de sjå resultat i form av reportasjar og liknande?
– Ja. Dei har lova å senda oss alt materiale. Eg er veldig spent, seier Vedvik.
