Idrettslaget ynskjer å etablera ein «villmarkspark». Laget ser føre seg eit område på om lag 16 dekar ovanfor skogsvegen ved Grøning. Førebels har idrettslaget inngått ein intensjonsavtale med grunneigar Linda Lid om å få disponera området. Området kan nyttast til trening, leik og konkurransar med til dømes «tarzanløyper» og klatre- og balanseøvingar.
Det kjem fram i ein e-post kasserar Olav Sletvold sende til Kvam herad i vinter. I e-posten bad han om ein førehandskonferanse for å få presentera planane. Ein førehandskonferanse vart gjennomført i slutten av januar.
I ei tilbakemelding etter førehandskonferansen skriv Bjørn Vik, fagleiar for byggjesak og geodata, at området er avsett til landbruk, natur og friluftsliv (LNF) i kommuneplanen. Ein aktivitetspark er søknadspliktig etter plan- og bygningslova og vil krevja dispensasjon frå plankravet og LNF-føremålet.
Sletvold opplyser til HF at planane førebels ligg litt på vent, då idrettslaget held på med eit anna prosjekt i desse dagar. Eit lager på friidrettsbana vert bygd på for å laga til styrkerom og garderobar. Taket på tilbygget er tett, og truleg går vinteren med til å gjera det ferdig, spår Sletvold.
– Saka vert kanskje teken opp att når me er ferdige, seier Sletvold.
