Vil laga leikeområde på Torsnes

Det går fram av ein søknad send til Ullensvang kommune. Der står det at ungdomslagshuset er tilgjengeleg for store og små, men at uteområdet har eit stort forbetringspotensial. Uteplassen har ein grusbane med fotballmål og nokre rekvisittar til 17. mai-leikar. Ungdomslaget planlegg å setja opp ein gapahuk og laga til eit leikeområde. Håpet er at området kan nyttast av barnehage og skule, står det i søknaden.

– Me ynskjer ein samlingsplass for barn og unge, og andre som kan ha glede av gapahuken og leikeområdet, skriv Arne-Olav Gangdal for ungdomslaget.

Laget har henta inn tilbod frå Sandvik Play AS på fleire leikeapparat. Temaet er eventyrleg bondegard. Det er mellom anna søkt om stønad til eit leikehus, ein traktor med tilhengar, ei hanevippe og eit større kombinasjonsapparat. Viss det ikkje er mogleg å få pengar til alle apparata, ynskjer laget stønad til nokre av dei.

Ungdomslaget peiker på at området rundt huset ikkje er ein optimal samlingsplass for born og unge. Sidan det ikkje er nokon leikepass, vert området nytta til parkeringsplass, heiter det i søknaden.

– Det er ein god visjon å ha at alle born og unge i Ullensvang kommune skal ha tilgang på ein leikeplass i nærområdet. Stønad kan fremja inkludering og gje eit sterkare, meir attraktivt og levande lokalsamfunn på Torsnes, skriv ungdomslaget.

Området kan ifylgje ungdomslaget bidra til utandørsaktivitetar for dei lokale i Ullensvang kommune, spesielt for unge på Torsnes. Det er viktig for at Torsnes skal vera ein attraktiv stad å leva og for å visa at ein utviklar samfunnet i regionen, skriv ungdomslaget.

I søknaden står det at laget håpar at kommunen kan hjelpa til med å realisera draumen om ein samlingsplass.

Silje-Margrete Fjærtoft har oppretta ein Spleis for å samla inn pengar til å kjøpa materialar og leiker. I skildringa av spleisen står det at sponsorar har bidrege med noko, men at siste del manglar. Fredag morgon var det samla inn rett over 8.000 kroner, som er berre 16 prosent av målet på 50.000 kr.