Vil kutta utslepp
Kollektivselskapet Skyss ynskjer å leggja til rette for nullutsleppsteknologi i ni nye transportkontraktar om båtruter i tidlegare Hordaland fylke.
Skyss har starta arbeidet med å førebu utlysing av båtkontraktar som går ut i 2026 og 2027. Mellom desse er turistrute Hardanger.
Det går fram av sakspapira til eit møte i Hardangerrådet i Eidfjord torsdag 26. oktober. Skyss har invitert Hardangerrådet til eit digitalt sonderingsmøte same dag om anbodet på ruta i Hardanger.
Eigar av Skyss, Vestland fylkeskommune, har høge ambisjonar for kutt i klimautslepp. Utlysing av nye kontraktar er eit godt tidspunkt for å stilla krav til drift av rutene og utslepp, for å kunna stetta både nasjonale og regionale krav om nullutslepp, meiner Skyss.
Selskapet har kontrakt med Norled om ruta i Hardanger. Denne går fram til 31. oktober 2024, og oppdragsgjevaren har opsjon til å lengja kontrakten med ytterlegare eitt år i slengen i inntil to år.
Skyss ynskjer òg å drøfta eventuelle strukturelle endringar for å tilpassa tilbodet til dei reisande sitt behov. Selskapet har bede regionrådet om å samordna innspel om ruteplan, driftsperiode, framtidige utsleppskrav, samordning av båttilboda på Hardangerfjorden og mogleg framtidig økonomisk stønad til turistbåtruta.
Ei fyrste politisk handsaming av rammene for båtanboda skjer truleg tidleg i 2024. Kontraktskrava og utlysinga av kontraktskonkurransen vil etter planen verta handsama av fylkesutvalet i 2024. Hardangerrådet vil før dette verta invitert til å gje nye innspel når Skyss har utarbeidd forslag for båtrutene, skriv selskapet.
Den noverande avtalen mellom Hardangerrådet og Skyss fastset eit årleg driftstilskot på 500.000 kroner.
