Vil kjøpa seg fram i køen: – Det er den mogelegheita me har

Kvam herad ønskjer ein gang- og sykkelveg frå torget i Ålvik til pensjonistheimen.

Heradet påpeikar at strekninga i dag ikkje er trygg for mjuke trafikantar, som må gå langs bilvegen.

Den største delen av denne planlagde gang- og sykkelvegen går langs fylkesveg 79, som er Vestland fylkeskommune sitt ansvarsområde.

Men Vestland fylkeskommune slit kraftig med økonomien. Ein har ikkje pengar å bruka.

Derfor har Kvam herad søkt om å få vera med og betala for prosjektet sjølv, for å få fortgang i det. Denne typen løysing blir kalla «samfinansiering».

Vil betala halvparten

I prinsippet burde heradet eigentleg ikkje betala for noko som er fylkeskommunen sitt ansvar, seier ordførar i Kvam, Torgeir Næss (Ap)

– Men fylkeskommunen har dårleg råd, og har sjølv opna for denne type løysing for å få realisert prosjekt, seier Næss.

Alle fylkeskommunale vegprosjekt som ikkje er samfinansierte, er lagde på is. Fylkeskommunen har ikkje råd, opplyser leiar for hovudutval for samferdsle og mobilitet (SAMO) i fylkeskommunen, Arve Helle (Ap).

– Er samfinansiering då ein måte å kjøpa seg fram i køen på?

Ordførar Torgeir Næss drar litt på det.

– Ja, det er jo det. Det er den moglegheita me har til å få realisert prosjektet.

Prosjektet i Ålvik har ein stipulert kostnad på i overkant av 12 millionar kroner, og administrasjonen i Kvam har foreslått å dela kostnadane likt med fylkeskommunen.

I første omgang er søknaden frå administrasjonen send for å sjekka om fylkeskommunen er interessert i å gjennomføra prosjektet dersom kommunen spyttar inn pengar.

Om fylkeskommunen er det, må samfinansieringa godkjennast av Kvam heradsstyre, opplyser Næss.

Blir diskutert

Om kommunar med pengar i praksis kan betala for å komma fram i vegprosjektkøen, kva då med dei kommunane som ikkje er så heldige? Problemstillinga blei diskutert i førre SAMO-møte.

Trude Brosvik (KrF) meiner at ordninga i utgangspunktet er positiv, då den gir mogelegheit til å få ting gjort.

– Samtidig kan det føra til at rike kommunar blir uretteleg prioriterte. Det er vårt ansvar å vera klar over det, sa ho.

Også i kommunestyremøtet 13. november i Ullensvang blei temaet tatt opp. Kommunen ønskjer nemleg samfinansiering med fylkeskommunen i fylkesvegprosjektet ved Egne hjem i Odda.

– Er dette ein måte å koma lenger fram i køen på? Om svaret er ja, er eg skeptisk. Det ville vera eit nytt prinsipp, sa kommunestyrerepresentant Harald Sandvik (Sp) frå talarstolen.

Ordførar Roald Aga Haug (Ap) svarte at eigentleg bør alle aktørar betala for eigne vegar.

– Men det er no slik at prosjekta der kommunen er med på å betala, blir prioriterte. Det er heller ikkje heilt nytt for oss. Fylkeskommunen har sagt klinkande klart til oss at om kommunen ikkje blir med på å finansiera gang- og sykkelveg i Jondal og Egne hjem, så blir det ingenting, sa han.

Kommunalsjef for kultur, næring og samfunn, Kristian Bondhus-Jensen, la til at samfinansiering meir og meir har blitt normalen.

– For tjue år sidan var det kanskje unormalt, men det er andre tider, slik me oppfattar det.

Ikkje eit krav

John Martin Jacobsen, avdelingsleiar i Vestland fylkeskommune, bekreftar at det har vore ein auke i samfinansieringsprosjekt dei siste åra.

Det er fylkestinget som har vedtatt at slike prosjekt skal ha større sjanse for å bli prioriterte, fortel han.

Han understreker at samfinansiering ikkje er eit krav.

– Fylkeskommunen legg vekt på at tiltaka skal ha ein positiv effekt, særleg knytt til trafikktryggleik og tilbod til gåande og syklande, seier han.

– Vanskeleg å svara på

Utvalsleiar Helle meiner at samfinansiering er god utnytting av ressursane, men at ein må finna ein balanse.

– Kan ordninga føra til kommunar utan god råd ikkje får realisert vegønska sine?

– Det er vanskeleg å svara på. Ein kan heller seia at kommunane som har god råd, gjerne får realisert sine prosjekt raskare enn dei elles hadde gjort, seier Helle.

Han understrekar at det berre er ein mindre del av den samla samferdselspotten i fylkeskommunen som er sett av til samfinansiering. Den største delen av pengane er sett av til prosjekt som er også er finansierte gjennom bompengepakkar, eller saman med staten, som skredsikring og ferjesamband.