Vil kjøpa lokal kraft
Fjordkraft AS kan verta forkasta til fordel for Kvam Kraftverk AS som straumleverandør.
Kyrkjeverje Olav Skeie Lid rår fellesrådet til å handla krafta lokalt, mellom anna av di han ynskjer å kunna snakka andlet til andlet med leverandøren.
Kyrkja kjøper i dag kraft frå Fjordkraft med ein sikringsavtale gjennom Knif. Om avtalen løner seg, avheng av prisen, men han gjev føreseielege vilkår, påpeikar Lid i saksutgreiinga.
– Me betalar litt meir enn me treng for å vera skånte for dei verste utslaga av ein uregjerleg spotpris, skriv han i sakspapira til møtet onsdag 27. september.
Kvam Kraftverk tilbyr ulike typar avtalar som det ifylgje Lid er lett å gå seg vill i. Viktigasrt for han er at hans inntrykk er at selskapet er oppteke av økonomien til kyrkja. Dessutan har det lokale kraftverket tilbod kyrkja romsleg kredittid, i fall likviditeten er dårleg.
Om Fjordkraft skal forkastast, må kyrkja betala ein såkalla overkurs som kan slå båe vegar. I dag vil han medføra ei rekning på 30.000 kroner. Dei pengane hadde vore gode å ha til andre føremål, meiner Lid.
– Men summa summarum: Kyrkjeverja trur – som alltid – at det er godt å venda heim att, på alle måtar.
