Vil jobba for lagarbeid og levande bygder

Sp sin ordførarkandidat i Ullensvang kommune tek imot HF heime i Jondal. Det som tidlegare var døra inn til besteforeldra sitt bakeri, er no døra inn til heimen hennar. At favorittfargen er blå, er tydeleg og litt uventa.

Fire år har gått sidan Jondal kommune vart historie. I valperioden har Sp hatt ni representantar i kommunestyret, med Lindskog-Lund som gruppeleiar. Ho føler Sp har funne «sin» plass, og at partiet er klart og tydeleg både som opposisjonsparti og som framtidig styringsparti.

– Korleis har Jondal og andre utkantar kome ut av det?

– Eg synest det har vore litt for mykje Odda-fokus. Det har nok litt med samansetninga av kommunestyret å gjera. Eg håpar det kan balanserast litt meir i dette valet, seier 41-åringen.

– Folk seier at Sp er anti-Odda. Det er me aldeles ikkje. Men me er opptekne av at også bygdene skal vera levedyktige. Om kommunen skal vera levedyktig, lyt bygdene vera med.

Dei siste fire åra har Sp i altfor liten grad fått vore med og påverka, synest Lindskog-Lund. Det kjenner ho på med å vera i opposisjon. Sp sine meiningar har betydd veldig lite, og partiet har ikkje fått særleg gjennomslag.

– Det er difor me prøver oss igjen.

Lindskog-Lund er nemleg ikkje ei som gjev seg om ikkje det går hennar veg. Det hjelper ikkje å setja seg ned og stura og ikkje gjera noko, meiner ho. Då er det betre å halda fram og prøva å påverka.

– Ullensvang er framleis ein veldig ny kommune. Me har ikkje landa enno. Me har ikkje fått ein felles kultur. Me har ikkje vorte den gode kommunen, seier ordførarkandidaten.

– Kan skifta meining

Valkamp tyder full rulle for Lindskog-Lund, og det er både strevsamt og travelt. Sidan 15. august har ho vore kjøpt fri 50 prosent frå stillinga som avdelingsleiar ved Odda ungdomsskule. Det er ikkje ideelt like etter skulestart, vedgår politikaren, men slik er det. Å stå på stand, debattera og vitja verksemder fyller det meste av tida fram mot valet.

– Kva er den viktigaste saka for Sp?

– Det er å ta heile kommunen i bruk. Å sikra levande bygder og ein livskraftig by som balanserer kvarandre.

– Og for deg?

– Det er den same. Nett den saka betyr så mykje for utviklinga til kommunen og for at me skal verta ein god kommune.

Å selja seg sjølv inn til veljarane er ikkje ordførarkandidaten så glad i. Då er det lettare å selja sakene. Når ho likevel vert beden om å seia litt om hennar positive sider, seier ho at ho lét seg engasjera av det meste og torer stå for meiningane sine. Også «lyttande» nemner ho. Med det meiner ho at ho er open for betre argument.

– Eg meiner ein kan skifta meining så lenge det ligg «jysla» gode argument i bordet. Så eg er ikkje sta for å vera sta. Eg er sta fordi det ikkje er kome betre argument, seier 41-åringen.

Rigorøs eller rettferdig?

I eit møte skulda Gard Per Arne Folkevord (Ap) partiet for å vera for oppteke av formalitetar og for lite oppteke av utvikling.

– Er det noko i det?

– Me synest at det skjer litt ofte at fristar ikkje vert haldne og at ting vert vedtekne utan at saka er skikkeleg greidd ut. Me er opptekne av at sakene skal vera opplyste og at det skal vera opne prosessar i forkant av eit vedtak. Det synest ikkje me alltid skjer. Så er det den kjensla av at nokon sit med meir informasjon enn andre. Er det greitt? spør Lindskog-Lund tilbake.

Ho nemner utmelding av Indre Hordaland Miljøverk, løyving av pengar til ei privat båthamn på Lofthus og kjøp av aksjar i Odda Næringspark som døme på saker der ho meiner at i alle fall delar av kommunestyret fekk for lite informasjon.

Partiet er oppteke av utvikling, men også av at det skal gjerast skikkeleg. Og at nokon skal få alt dei vil utan å halda seg til søknadsfristar som alle andre lyt halda seg til, er ikkje greitt, synest ho. Det lyt vera likt for alle. Sp er ikkje vanskeleg for å vera vanskeleg, poengterer ho.

– Er det noko Sp vil gjera annleis i komande valperiode?

– Om me kjem i posisjon, vil eg ha eit godt samarbeidsklima i kommunestyret. Sjølv om me skal vera ueinige, er det ein del saker me er veldig einige om. Samferdsel, til dømes, er det ikkje så stor usemje om. Då lyt me dra lasset saman og ikkje småkrangla internt.

Kulturkrasj

Dei siste fire åra har Lindskog-Lund erfart at skilnaden mellom Jondal og Ullensvang kommunestyre er stor. Det har vore noko heilt anna enn det ho var van med. At partiet hennar har sete i opposisjon no, og sat i posisjon i Jondal, kan ha noko å seia. Klimaet og kulturen kjennest mykje hardare.

– Det har eg kjent litt på. Eg trur det er ein kulturkrasj, på ein måte. I Odda var det slik, men i Jondal og Ullensvang har det ikkje vore slik, seier Lindskog-Lund.

Det har vore ein stor overgang, både med tanke på å vera i opposisjon i staden for posisjon, og med kulturen og debattklimaet. I Jondal var fokuset på å finna gode løysingar i staden for å køyra på med kvarandre sitt syn, fortel ho. Det var eit meir lyttande kommunestyre. Det saknar ho.

– Kan det vera sunt med ein tøffare debatt?

– Det kan vera både sunt og usunt. Bra i form av at ein får den klare meiningsutvekslinga, men så kan det vera nokon som ikkje torer seia meiningane sine. Då tenkjer eg det ikkje er sunt. Då vert ein berre overkøyrd, seier Lindskog-Lund.

Fan av samarbeid

Skilnaden har ført til at politikaren har lært seg å vera tydelegare og tøffare. Ho har òg lært at samarbeid ikkje kjem av seg sjølv.

– Det kjenner eg litt på. Det har me ikkje fått til på ein god måte, synest eg. Det har vore veldig tydelege skilje. Eg er jo fan av samarbeid, men det lyt vera eit reelt samarbeid, seier 41-åringen.

– Kva parti kunne Sp tenkja seg å samarbeida med i komande periode?

– Me er opne for samarbeid med dei fleste. Men det skal vera eit reelt samarbeid og ikkje noko diktering. Å samarbeida med Ap ser eg ikkje føre meg vert enkelt.

– Er det uaktuelt?

– Det er ikkje langt ifrå i alle fall. Eg veit det er folk som vil at me skal samarbeida, men slik det er no, så er det rett og slett vanskeleg, seier ordførarkandidaten.

Lite kreativt

Ein heit diskusjon i Ullensvang har vore gondolsaka. «Nei til gondol til Rossnos» står det i partiprogrammet til Sp. Kva er problemet? lurer HF på.

Lindskog-Lund trekkjer pusten djupt når spørsmålet kjem. Det er fleire problem, seier ho. Fleire av grunneigarane vil ikkje ha det, naturmangfaldet vert råka og det er førebels eit urørt område. Ein ny inngang til Hardangervidda er heller ikkje positivt, konstaterer ho.

– Ein kan seia at ein skal stoppa dei som skal kita midtvinters, til dømes, men eg trur ikkje ein klarar å stoppa det. Så er det jo råd å vera litt kreativ. Me treng ikkje kopiera det alle andre har gjort. Det byrjar å verta ein del gondolar. Kor attraktivt vert det? spør ho.

Lindskog-Lund påpeikar dessutan at det allereie er mange turistar i kommunen. Kanskje for mange, synest nokon. Kommunen har ikkje fasilitetane som gjer at han kan ta godt vare på både turistar og fastbuande, meiner ho.

– Kva er dine svake sider som politikar? spør HF til sist.

– Høyr med motstandarane mine. Dei veit sikkert alle, skrattar Lindskog-Lund.