Vil jakta i fem månader
Kommunane Ullensvang og Kvam ynskjer å utvida jakttida på hjort.
Dei vil ha ei jakttid frå 20. august til 31. januar for å redusera utfordringane med beiteskadar på innmark og skog. Utvidinga av jakttid kan gjerne gjelda berre på innmark som er hausta, skriv kommunane i ei felles fråsegn.
Kommunane i Vestland fylkeskommune er bedne om å senda inn innspel til forskrifta om jakt- og fangsttider for perioden 2022—2028.
Sams uttale
Kvam herad kjøper tenester frå Ullensvang i skog- og viltsaker. Ullensvang og Kvam er store landbrukskommunar med til dels tette hjortebestandar. Dette fører til store problem for landbruket gjennom beiteskadar på eng og frukttre, som igjen fører til monalege reduksjonar i avlinga, skriv kommunane.
Jaktvalda er organiserte i storvald og bestandsplanområde. Det vert gjeve mange nok løyve til å kunna redusera problemet med beiteskadar. Utfordringa er at hjorten held seg høgt i terrenget og til dels i fjellet under jakta. Når snøen kjem, vert hjorten pressa ned mot dyrka mark. Det skjer stadig seinare på hausten, og gjerne etter at jakta er avslutta.
— Må utvida tidene
— Skal ein få løyst problemet, er utvida jakt einaste løysing, skriv kommunane.
Dette gjeld også utviding av jakta før den ordinære jakta startar 1. september, for å ta ut dyr som oppheld seg på innmarka i vekstsesongen. Kommunane har nytta viltfond for å løysa nokre av utfordringane i fruktnæringa med viltgjerde. Også Innovasjon Noreg har støtta gjerda.
— Dette hjelper ikkje dei som driv med grasproduksjon, skriv Ullensvang kommune.
Det er så mykje areal med grasproduksjon at om desse skulle få stønad frå viltfondet, ville det forsvinna med ein gong. Dei som driv med frukt, grønsaker og juletre, vert difor prioriterte, då slik produksjon kostar meir å etablera, opplyser kommunane.
Føreslår utvida jakttid
Miljødirektoratet har sendt på høyring eit framlegg om utvida jakttid på elg og hjort frå og med 1. til og med 31. januar 2022 i Ullensvang, Voss og fem andre kommunar. Bakgrunnen er målet om å fjerna skrantesjuka i Noreg.
I denne perioden kjem hjorten inn på innmarka og gjer ein del skade. Målet med den utvida jakttida er at dei som driv grasproduksjon, skal kunna ta ut skadedyr i ordinær jakttid i staden for å måtta søkja om skadefellingsløyve.
Hjort kan i dag skytast frå 1. september til 23. desember.