Vil ikkje visa ålmenta innspel om ny organisering

HF skreiv i august om ein mellombels stolleik som var i gang på rådhuset. Bakgrunnen var at både leiar for samfunn, kultur og næring, Jon Nedkvitne, og teknisk sjef Lars Ese Ur gjekk over i anna arbeid. Andre vart konstituerte i stillingane deira.

Fyrst ikkje lagra

Eit forslag om permanent omorganisering vart lagt fram for arbeidsmiljøutvalet 27. august, før det vart sendt på høyring til dei tilsette. Fristen for å senda innspel var 11. september. HF bad om innsyn i høyringssvara og alle andre dokument i saka.

Dei ynskjer ikkje rådmann Anita Hesthamar å dela med ålmenta. Fyrst opplyste ho at innspela til framlegget ikkje eingong var journalførte. Dei vart nemleg rekna som organinterne dokument, som det etter arkivforskrifta ikkje er plikt til å journalføra utover det organet «finn tenleg». Ifylgje svaret meiner rådmannen at det i prosessen er viktig «å kunne ha ein intern sfære der informasjon kan haldast fortruleg».

HF klaga på avslaget 24. september. I klagen påpeika lokalavisa at det er tvilsamt om det er i tråd med intensjonen bak arkivforskrifta å droppa journalføring av innspel i ei større omorganisering.

Avisa hevda vidare at den nye organiseringa vil få store fylgjer for ålmenta i form av maktutøving og forvalting av fellesskapsressursar, at det vil vera nyttig seinare å dokumentera bakteppet for endringane i organisasjonen, og at organiseringa – og innspela – har stor offentleg interesse.

Vil ha friplass

Argumenta overtydde ikkje rådmannen om meir enn at dei burde vore journalførte. Ho heldt fast ved avslaget og sende saka til endeleg avgjerd hjå Statsforvaltaren. Ifylgje rådmannen er det kome 19 innspel frå enkeltpersonar, avdelingar og fagorganisasjonar.

– Dokumenta er forslag frå dei tilsette om kva dei meiner bør endrast i rådmannen sitt framlegg og kvifor, kva dei meiner er positivt i framlegget, og andre innspel. Dersom HF får innsyn i høyringsinnspela, og vil referera desse, vil ein ikkje få eit riktig inntrykk av saka, og det vil skapa forvirring då dei tilsette eller dei ulike avdelingane kan meina litt ulikt og ha motstridande meiningar om framlegget. Dersom slike innspel ikkje skal kunna få vera interne arbeidsdokument, vil det bli vanskelegare å få dei tilsette til å koma med ukonvensjonelle og frie forslag og løysingar. Det er lettare å meina noko fritt når ein veit at det ein skriv, ikkje vil koma på trykk i lokalavisa, skriv rådmannen.

Ho forsikrar om at ho vil informera omverda om innspela, vurderinga av dei og konklusjonane når ny organisering er bestemt.

Statsforvaltaren har enno ikkje avgjort klagesaka.