Vil hjelpa til med sentrumssatsing
Norheimsund Næringslag kan få 100.000 kroner til å utvikla «Nistagato».
Det er summen rådmannen føreslår at politikarane løyver til prosjektet. Det går ut på eit samarbeid om å utarbeida ein overordna plan for å utnytta potensialet i gata ved torget og haldeplassen i Norheimsund, som på kartet heiter Nedstegata. Vona er å oppgradera gata, til dømes som eit gatetun med overbygg.
Rådmannen meiner det er viktig å ha eit levande sentrum, og skriv at utvikling av gata kan auka attraktiviteten. Området kan verta ein ressurs i samband med festivalar, torgdagar og andre arrangement, skriv ho.
Søkjaren, som skal samarbeida med Norheimsund Grendautval, ynskte 185.000 kroner, som er halvparten av den stipulerte prosjektkostnaden på 370.000 kroner. Planen for gata, som kan vera ferdig i 2025, skal seia noko om mogelegheiter, utforming og materialval.
Formannskapet drøftar saka 7. november. Heradsstyret tek avgjerd 14. november.
Ei arbeidsgruppe som arbeider med prosjektet, har invitert ei rekkje verksemder til orienteringsmøte om saka på Sjøhuset måndag 4. november.
