– Vil hjelpa med å hjelpa

Tysdag ettermiddag var Alida Constanse Fonneland og Steinar Bøe i full sving med å setja opp eit juletre på Straumen i Norheimsund. Juletreet er eitt av to som vert sette opp av den lokale Raudekrossen i desse dagar. Det andre skal stå i Tunet i Øystese.

Greinene vil etter kvart få på seg lappar med juleynske frå familiar som treng hjelp, fortel Fonneland. Dei som vil bidra, kan ta med lappen, kjøpa ei gåve tilsvarande ynsket, og levera gåva med lappen på i ein dunk ved sidan av juletreet innan 16. desember.

Tomme lommebøker

Fonneland er administrativ leiar i Øystese Røde Kors, og personen som står bak initiativet til julegåveaksjonen lokalt. Inspirasjonen har ho henta frå Raudekrossen i Sandefjord, som har hatt julegåveaksjon i sju år.

– Jula er vanskeleg for mange, og kanskje for fleire i år enn før. Eg har lyst til å gjera noko for borna til dei som ikkje har så mykje, seier Fonneland.

At Sandefjord Røde Kors held på med det same, gjer at lokallaga ikkje treng å finna opp krutet på nytt, fortel Bøe. Han tykkjer aksjonen er eit bra initiativ.

– Det er fleire og fleire det går tomt for i lommeboka. Det skal ikkje gå ut over dei minste, seier Bøe.

God respons

Tilbodet er meint for familiar i Kvam med born i alderen 0–18 år og svak økonomi. For å søkja, trykkjer ein på ei lenkje som er lagd ut på Facebook av Øystese Røde Kors.

Dei som søkjer, er anonyme. Berre Fonneland ser namna. Ho gjev søkjaren og ynsket eit nummer.

Julegåveaksjonen vart opplyst om i sosiale medium måndag kveld, og den fyrste søknaden er allereie på plass, fortel initiativtakaren. Dessutan har det kome inn over 4.000 kroner det fyrste døgeret.

Pengane brukar Raudekrossen til innkjøp av gåver. Om det vert samla inn meir pengar enn det som trengst, vert pengane vidareførte til neste års prosjekt.

I Ålvik òg?

I fjor delte Øystese Røde Kors i samarbeid med Coop Extra i Øystese ut matkassar til dei som trong slike. Det var veldig vellukka, ifylgje leiar i Øystese Røde Kors, Andreas Jacobsen. Det vart delt ut mat for mellom 20.000 og 30.000 kroner, fortel han.

Ingrid Laupsa Tjosaas driv velgjerd gjennom Facebook-gruppa «Betre Kår - Kvam». Ho seier at ho i år held fram som i fjor, og hjelper folk mest gjennom barnevernet og avdeling for rus og psykisk helse i heradet. Om dei treng noko, prøver Tjosaas å ordna det. Det er òg nokre familiar ho hjelper gjennom året.

– Eg er veldig glad for at Røde Kors har starta julegåveaksjonen, seier Tjosaas.

Ho legg til at ho i samarbeid med Raudekrossen håpar å få opp eit juletre på butikken i Ålvik òg.