Billettinntektene i Hardangerbadet var også i fjor for små til å dekkja underskotet i det kommunale føretaket. Dermed må Kvam herad truleg på banen igjen.

Vil hjelpa Hardangerbadet med nye millionar

Men rådmannen synest ikkje noko om at Hardangerbadet AS hevdar at Kvam herad er forplikta til det.

Sigbjørn Linga
Bladstyrar
Publisert

Også 2021 vart eit dårleg økonomisk år for Hardangerbadet. Den oppgjevne årsaka er pandemien. Det gjer selskapet ute av stand til å gjera opp for seg i form av «husleige» til Kvammabadet KF. Difor ber selskapet også i år om kommunal naudhjelp.

Krev private ytingar

Hjelpa vil rådmann Anita Hesthamar gje, men ikkje vilkårslaust. Ho meiner dei folkevalde bør yta to millionar kommunale kroner, men føreslår å krevja at Hardangerbadet Eigedom AS yter éin million. Dessutan må dei private kausjonistane som har garantert å dekkja underskot, i år som i fjor ut med i alt éin million kroner.

I tillegg ynskjer rådmannen framleis ha tilsendt perioderekneskapar og besøkstal annankvar månad, slik heradsstyret kravde i fjor. Ho vil dessutan krevja at tala syner fordelinga mellom enkeltbillettar og årskort, noko som har mykje å seia for inntektsnivået. Slike tal leverte Hardangerbadet i starten i fjor, men seinare vart berre samla besøkstal leverte.

Rådmannen meiner at det er rimeleg at Hardangerbadet får stønad i den spesielle situasjonen. Drift og forvalting av det kommunale føretaket, som Hardangerbadet skal dekkja, har vore monaleg dyrare – 0,45 millionar kroner – enn budsjettert. Heradet bør også ta ansvar for at «perioden og omfanget i oppstartsstyret» heldt fram lenger enn føresett, meiner ho.

– Deira ansvar

I søknaden viser Hardangerbadet til ei avtala underskotsfordeling og ber Kvam herad dekkja 76 prosent – 2,2 millionar – av underskotet på 2,7 millionar i Kvammabadet. Resten skal Hardangerbadet Eigedom dekkja, skriv selskapet. «Hardangerbadet AS ber om at underskotet vert gjort opp så snart som mogleg», heiter det i søknaden. Den nemnde fordelinga mellom partane vart endåtil «godkjend» i eit styremøtet i eigedomsselskapet i februar.

Framstillinga får rådmann Anita Hesthamar til å reagera.

– Avtalen seier klart at det er Hardangerbadet som har ansvar for at Kvammabadet går i balanse. Kvammabadet eller Kvam herad har ikkje ansvar for underskot, skriv Hesthamar, som etterlyser eit komplett og periodisert likviditetsbudsjett.

Samarbeidsavtalen

• Samarbeidsavtalen mellom Kvammabadet KF, Hardangerbadet AS og Hardangerbadet Eigedom AS fordeler kostnader og inntekter.

• Samla kostnader med drift, forvalting og vedlikehald av heile bygget Hardangerbadet vert fordelte med 64 prosent på Kvammabadet KF og 36 prosent på Hardangerbadet AS.

• Kvammabadet får 76 prosent av netto billettinntekter og Hardangerbadet AS 24 prosent.

• Kvammabadet KF skal ikkje gå med underskot. Hardangerbadet AS er ansvarleg for å dekkja kostnadene i føretaket gjennom ei «husleige», fråtrekt eit kommunalt tilskot som skal tilsvara innsparinga med å leggja ned fleire basseng.

• Kvam herad og Hardangerbadet Eigedom AS eig kvar sine delar av Hardangerbadet, og leiger dei ut til Hardangerbadet AS.

Vil skriva notat

Grunngjevinga for å yta kommunale kroner til selskapet er at rådmannen vil sikra skulebading og sikra ålmenta tilgang til badeanlegget. I fjor opplyste rådmannen at heradet truleg må betala staten tilbake om lag 30 millionar kroner i spelepengar til anlegget om ikkje det vert halde ope for ålmenta.

Det finst internasjonale reglar som avgrensar kor mykje tilskot det offentlege kan yta i såkalla bagatellmessig stønad til private verksemder. I saksutgreiinga i samband med 2020-underskotet opplyste rådmannen i fjor at grensa er til saman 200.000 euro, eller om lag to millionar kroner, over tre år.

– Før Kvam herad vurderer å yta tilskot til Hardangerbadet AS utover grensa for «bagatellmessig støtte», bør spørsmålet om slik støtte vil vera lovleg utgreiast, skreiv rådmannen den gongen.

Om dei folkevalde støttar innstillinga frå rådmannen, vil Kvam herad ha løyvt 3,5 millionar kroner til saman i 2021 og 2022. Hesthamar opplyser til HF at det burde ha stått noko om temaet i den nye saksutgreiinga, og at ho vil skriva eige notat om det. Tanken har vore at styret i Kvammabadet skulle greia dette ut, men det har ikkje vorte gjort, ifylgje rådmannen.

Store tap

Eigenkapitalen til Hardangerbadet er minus 1,7 millionar kroner. I 2022 auka aksjonærane kapitalen med om lag 1,35 millionar. Sidan anlegget opna i 2019, har selskapet eit udekt tap på 5,7 millionar kroner pluss 1,7 millionar kroner i fjor, ifylgje rådmannen.

Resultatet i Hardangerbadet i fjor var om lag minus 0,4 millionar kroner, medrekna er offentlege tilskot på 2,65 millionar kroner. 1,5 millionar av desse kronene kom frå heradet.

Det samla besøkstalet i fjor vart 39.036, vel 10.000 færre enn i det fyrste heile driftsåret. I dei to fyrste månadene i år hadde anlegget høvesvis 2.590 og 3.318 gjester. Då heradet gjekk inn i prosjektet i 2017, var det stipulert eit årleg besøkstal på 61.500 pluss besøket 750 årskort utgjer. Seinare besøksprognosar har ikkje vore offentleg tilgjengelege.

hardangerbadet økonomi nyhende kvam herad øystese økonomisk politikk
Laga med Labrador CMS