– Vil heva kompetansen
Hardanger har etter kvart opplevd ei blomstring av gode serveringsstader, men kvaliteten varierer, meiner Jon Aga. No vil kvemmingen starta Hardanger Matakademi.
Hardanger Matakademi skal vera eit regionalt opplæringssenter for lokal matfagleg kompetanse, og ha mål om å heva og auka forståinga for det gastronomiske nivået i Hardanger. Det kjem fram i ein søknad om stønad frå næringsfondet i Ullensvang kommune.
Gjennom selskapet AGA Hotel Consulting AS har Aga søkt om 150.000 kroner. Dei skal sikra start og utvikling av prosjektet. Prosjektet er tenkt gjennomført frå oktober 2024 til februar 2025, med ei total kostnadsramme på 300.000 kroner.
Ifylgje søknaden skal Hardanger Matakademi styrkja bruken av lokalmat blant fagfolk og verksemder i regionen. Akademiet vil òg ha fokus på kundeoppleving, samarbeid, kvalitet og berekraft i mat- og drikkeproduksjon. Med kursing og oppfylging av kokkar, servitørar og hotellmedarbeidarar kan både det gastronomiske nivået og sørvisen hevast i regionen, meiner Aga. Kurs vil han tilby to gongar i året, i Odda og Norheimsund.
Prosjektet vart presentert for Ullensvang kommunestyre i kommunestyret 16. oktober.
– Ein manglar kompetanse i faget, ikkje berre her i Hardanger, men overalt, sa Aga til dei folkevalde.
