Vil heidra innsats for ungdom i Kvam ...

Ungdomsrådet i Kvam vedtok i februar å oppretta ein ungdomspris som skal delast ut til ein person, lag eller foreining som har utgjort ein skilnad for born og unge i heradet.

Tysdag vedtok rådet statuttar for prisen.

Ungdomsrådet skal ha ansvaret for å dela ut prisen. Alle innbyggarar i Kvam kan føreslå kandidatar før ein fastsett frist. Prisen er ein statuett og ein diplom. Ungdomsrådet vel vinnaren og kan sjølv føreslå eigne kandidatar.

Bukken og havresekken

Halvard Lilletveit (Ap), politisk representant for heradsstyret i rådet, stilte spørsmål ved klokskapen i at rådsmedlemene, som skal kåra vinnaren, skal ha høve til å nominera, og viste til bukken og havresekken.

– Det kan sjå rart ut om ein kandidat som er nominert av ein rådsmedlem, vinn, sa han.

Fleire rådsmedlemer sa seg einige, medan Sander Eide Aase, som hadde skrive forslaget til vedtektene, påpeikte risikoen for at få personar vert nominerte, medan rådet sjølv har kjennskap til nokon som har utmerka seg veldig.

– Me må ikkje risikera at me sit i ein situasjon med få kandidatar, der folk har nominert den som jobbar på butikken som er finast å sjå på, eller læraren som lèt elevane spela fotball i gymmen, medan me sjølv kjenner til ei eldsjel som gjer mykje og stiller opp for ungdom, sa han.

Kan ikkje førehandslukka

Aase viste til kulturprisen til Kvam herad. Ei tildelingsnemnd kårar vinnaren. Kommunen kan sjølv fremja kandidatar som ikkje er føreslegne av innbyggarane.

Rådsmedlemene vart samde om å lata seg sjølve nominera. Rådet fjerna dessutan ei formulering om at kåringa skal skje bak lukka dører, etter at administrativ rådgivar Kari Weltzien Vik påpeikte at lukking må vedtakast med grunngjeving i sjølve møtet.