Vil halda fram med tunnelboring

For å få det til, må tunnelboremaskina, som vart skadd i ein flaum i Drangedal i fjor påske, koma tilbake i drift. Dette er ei stor forsikringssak, forklara bustyrar Johannes Romstad i ei skiftesamling i Hordaland tingrett 25. mars.

Romstad har sidan konkursopninga i byrjinga av februar jobba med å avklara forsikringsskaden etter flaumen. Om det skal vera håp, må det avklarast raskt kva som skal skje, sa han.

– Ganske dramatisk

Rett etter flaumen vart tunnelboremaskina reparert, og eit forsikringsoppgjer på om lag tre millionar kroner vart utbetalt. Etter reparasjonen vart det bora 170 meter til i fjellet før maskina kollapsa ein gong til. No står maskina att som eit vrak, opplyste bustyraren i skiftesamlinga.

Eit alternativ er at forsikringsselskapet betalar ut eit kontantbeløp for maskina. DNB godtek ei utbetaling på 3,5 millionar kroner, ifylgje Romstad. Eit anna alternativ er å halda fram forsikringssaka og få maskina reparert.

– Eg veit at Tore Eiken ynskjer at det siste skal skje, sa bustyraren.

Eiken ynskjer å kjøpa maskinparken tilbake, og har vore i forhandlingar med DNB og bustyrar. Ein kjøpekontrakt er klar, og Eiken får eventuelt finansiert kjøpet gjennom eit av selskapa han etter planen skulle samarbeida med i eit komande prosjekt. Selskapet vil derimot ikkje finansiera kjøpet før maskina er operativ.

Det er eigentleg ganske dramatisk, sa Romstad. Lagnaden til det planlagde prosjektet avheng av tunnelboremaskina, opplyste han.

Enorm maskinpark

Lagnadene i saka er mange, også for kreditorane som har levert varer og tenester for store beløp, men ikkje har fått betaling. Det kjem dei heller ikkje til å få, trur bustyraren.

– Dette er ein av dei større konkursane eg har vore borti på mange, mange år, sa Romstad.

61 kreditorar har meldt inn krav på til saman 54,3 millionar kroner. Det er snakk om ein enorm maskinpark, sa han. Parken tel 107 maskiner, og maskinene har vore eller er plasserte på Sørlandet og Vestlandet.

Ni av dei – mellom anna ein beltebil, ein dumper, ei brakke og nokre gravemaskiner – stod att på vossafjella etter eit prosjekt der som vart ferdig i 2023. Ifylgje bustyraren må det helikopter til for å flytta maskinene.

Mellom råka verksemder lokalt er Terrengform AS, Jondal Bil AS, Nils Aksnes & Co AS og Hardanger Energi AS. Summane dei tapar, er forholdsvis små i denne samanhengen.

Truleg får berre DNB – som aleine krev om lag 30 millionar kroner – att pengar. Men sjølv om Eiken kanskje får kjøpt maskinparken, vil ikkje kjøpesummen dekkja meir enn om lag halvparten av kravet frå banken.

Om Eiken får kjøpt tilbake maskinparken, er håpet å få dei tilsette med vidare. Dokumentasjon frå rekneskapsføraren syner at HM skuldar om lag to millionar kroner i feriepengar for 2023 og 2024. HM skuldar også løn for januar og oppseiingstid i 2024 for åtte tilsette, og tilhøyrande feriepengar.

Tomter i Mælsheiane

Ei anna problemstilling i konkursen er eit tomteareal i Herand. HM eig hundre prosent av aksjane i Ullensvang Holding AS – verksemda som tidlegare kjøpte det konkursråka hytteprosjektet ved Mælsheiane. Kjøpet vart finansiert med lån frå DNB, som har pant i tomtearealet.

Arealet rommar åtte hyttetomter. To av dei er klare, medan seks er uferdige. Fleire knytte til hyttefeltet har teke kontakt med bustyrar etter konkursen.

– Der er det litt kaos, sa Romstad.

Mellom anna undersøkjer Ullensvang kommune om det er gjort arbeid i strid med reguleringsplanen for området.

Han meiner at det er DNB som må seia kva banken ynskjer. Ullensvang Holding er eit eige aksjeselskap som står på eigne bein, og det er ikkje opna konkurs i dette selskapet. Bustyraren skal berre handtera aksjane. DNB har pant på to millionar kroner i tomtene, og det er truleg meir enn verdien av tomtearealet.

– Det er mange ulike problemstillingar, så det har vore travle tider med dette buet. Det vil nok ta ein del tid før me kan få dette ferdig, sa Romstad.

Det står att å gå gjennom rekneskapen og hjelpa tilsette som har krav på løn og feriepengar frå lønsgarantiordninga. Bustyraren vil dessutan avklara forsikringssaka og finna ei ordning for aksjane i Ullensvang Holding før han sender ei innstilling til tingretten. Så langt i handsaminga av buet har ikkje bustyraren avdekt straffbare forhold, opplyser han.

HF gjer merksam på at Tore Eiken er son til ektemannen til mor til redaktør Sigbjørn Linga. Red.