Vil ha tunnel bak sentrum
Fokus på mjuke trafikantar, samanhengande gangvegar og tunnel bak sentrum er mellom tiltaka Norheimsund Grendautval ynskjer.
Utvalet ber i innspelet til trafikksikringsplanen også om trafikksikring av Norheimsvegen og ein skiltplan for sentrum.
Av fysiske tiltak ber utvalet om veglys øvst i Norheimsvegen, 30-grense i hovudgata, fotgjengarfelt ved Hardanger fartøyvernsenter, sørvisskilt 0,5–1 kilometer frå sentrum, skilting til offentleg parkering, stell av tre i miljøgata, parkeringsplassar til turistbussar i turistsesongen og ny vegtilkome til Toloheimen.
– Denne vegen må etablerast utan ytterlegare utsetjingar, skriv grendeutvalet.
I overgangen frå gamle Straumbrua til gangbrua er det observert at born klatrar over gjerdet. Gjerdet bør bytast ut med noko mindre klatrevenleg, meiner utvalet.
Langs fylkesveg 49 i Steinsdalen er det framleis busstopp utan busslomme. Dette skaper trafikkfarlege situasjonar, påpeikar grendeutvalet.
