Vil ha sundagsope i Jondal og Odda

Kommunestyret i Ullensvang søker om å få tidlegare Jondal kommune og Odda sentrum godkjende som typiske turiststader.

Det vart vedteke mot fire røyster i eit elektronisk kommunestyremøte onsdag.

Kristin Elisabet Horne Moe (Ap), Andreas Jacobsen (R), Sindre Måge (R) og Håkon Kvammen (KrF) røysta mot, etter at framlegg frå R om å utsetta saka for å høyra synet til arbeidstakarorganisasjonane, vart stemde ned.

Jacobsen påpeikte at organisasjonen Handel og kontor, som representerer dei fleste butikktilsette, er mot forslaget.

Rådmann Ole-Jørgen Jondahl meiner likevel at synet til arbeidstakarane vert godt vareteke. Han sa at kommunen har vore i kontakt med Handel og kontor Hordaland. Vanleg prosedyre er at organisasjonane uttalar seg direkte til Fylkesmannen, som skal godkjenna søknaden.

– Viktig

Varaordførar Kjellaug Hoås Samland (Ap) meiner høvet til å halda butikkar ope på sundagar i sommarhalvåret er viktig for Jondal. Ho påpeikte at det er eit ønske frå næringa sjølv.

– Næringa er avhengig av god sommarhandel for å overleva. Det er med på å gjera butikkane meir robuste og arbeidsplassane meir attraktive, sa ho.

Aktørar i tidlegare Jondal som driv utleige, har måtta senda turistar vidare om sundagar fordi dei ikkje sel mat, opplyste ho.

Kommunestyret i Jondal avviste i 2018 eit liknande forslag. Berre Samland og Elin Eide Brattabø (H) røysta den gongen for å prøva å få status som typisk turiststad.

Avhengig av turistane

Trygve Bolstad (Ap) påpeikte at koronaviruset ikkje har gjort situasjonen enklare for verksemdene i kommunen.

– Eg håpar det kjem turistar i sommar, og at dette kan styrka grunnlaget for å halda på jobbar i butikkane, sa han.

Eivind Tokheim (V) påpeikte at trafikken gjennom kommunen er størst på sundagar. Han meiner òg at høvet til sundagsope er positivt for ungdommar som ønsker jobb.

Gard Folkvord (Ap) sa at kommunen har nådd eit vippepunkt der den lokale befolkinga ikkje lenger er stor nok til å halda i live eit robust og mangfaldig tilbod i Odda.

– Me må lena oss meir på turisttrafikken, som heller skulle ha vore eit verdfullt supplement, sa han.

Håkon Kvammen (KrF) meiner på den andre sida at lova om heilagdagsfred bør utøvast restriktivt.

– For dei som er i Odda på sundagar om sommaren, er behovet for mat det mest presserande. Dei har tilbod om kaféar, kioskar, hotell og bensinstasjonar, sa han.