Vil ha lengre tunnel
Vidar Grindheim saknar ei sterkare tilknyting til Nasjonal transportplan for reguleringsplanen for tunnelen mellom Steinsdalen og Eikedalen.
Han spør òg etter ei trafikkløysing for Norheimsund–Tørvikbygd. Det går fram av eit innspel til Vestland fylkeskommune om planarbeidet med tunnelen.
– Kva med grenda Eikedal, er det framtida å planleggja trafikk gjennom dette sårbare området? Kvifor ikkje ein tunnel ned mot Høysæter eller Børdal? spør han.
Grindheim spør seg om ikkje eit massedeponi i Eikedalen vil rasera miljøet der totalt.
Han undrar òg om tunnelen er den rette lokale løysinga for tilkome til Kvamskogen for bilistar frå Norheimsund.
Grindheim meiner det må finnast alternativ for ei samla totalvurdering for heile Vestlandet og aust–vest-sambandet, og at ein må sjå på lokale løysingar for seg.
Også Voss–Bergen bør vera med i desse alternativa, meiner Grindheim. Trongen for veg til Bergen er ofte vel så mykje ein trong for veg til Bergen Lufthamn, påpeikar han.
