Vil ha «gud» i lyspunktspørsmål

— Det er uråd for innbyggjarane å finna ut kven som har ansvar for gatelys. Dei vert sende i ein runddans mellom fleire. Me bør finna ei betre ordning for dette, sa Nygård i eigarmøtet i Kvam Energi AS onsdag.

Administrerande direktør Arne Tillung i kraftselskapet stadfesta at han og kollegaene sender ein og annan inn i denne runddansen. Ein og annan kontaktar nemleg kraftverket for å høyra om det er mogeleg å få sett opp eit gatelys. Dilemmaet er at Kvam Energi berre har ansvar for drift og vedlikehald på vegner av lyseigarane. Sistnemnde er heradet langs kommunale vegar og fylkeskommunen langs fylkesvegar.

— Me skulle hatt ein enklare måte å gjera dette på. Nokon må vurdera om ein skal bruka pengar, så gjer me jobben, sa Tillung.

Éi dør

Nygård sa at poenget hans er at meinige kvemmingar ikkje kan driva prosessane i møte med etatane. Når eit betre system for prosessen er på plass, kan ein starta jobben med å finna pengar til lysa, meiner han.

Tillung sa at det ikkje er ein enkeltperson ein kan senda dei lyslystne vidare til, og at kraftverket slit litt med å handtera førespurnadene.

— Me må finna ei ordning. Det burde vore ein avtale mellom kommunen, fylkeskommunen og kraftverket om slike førespurnader. Me skulle hatt éi dør, sa Jostein Ljones (Sp), som minte om at veglysa handlar om trafikktryggleik for mellom andre skuleborn.

— Det er synd at dei ringjer deg og at du må senda dei på ei lang reise. Det er ikkje verdig, sa Ljones til Tillung.

— Det går an å tenkja i retning av at me handterer slike søknader. Me burde vore meir eintydige og ikkje sendt folk inn i loopen, sa Tillung.

Ei plansak

Rådmann Anita Hesthamar minte om at veglysa kostar pengar, og at slike tiltak er knytte til den kommunale trafikksikringsplanen. Siv Håbrekke (Sp) påpeika at heradet må sikra at innspela vert følgde opp gjennom planen.

Tillung kunne på ståande fot ikkje svara på spørsmålet om kva eit enkelt lyspunkt kostar. Både stolpen og framføring av kraft kostar pengar.