Vil ha dispensasjon frå byggjegrensa
Etter ei synfaring viste det seg at opplagsplassen ved fylkesveg 550 i Herand var utvida utan løyve.
Det kjem fram i eit brev frå Vestland fylkeskommune til søkjaren. I 2022 søkte ein mann om dispensasjon frå byggjegrensa for å etablera ein rubbhall på opplagsplassen. Då gav fylkeskommunen tilbakemelding om at området framføre hallen var for lite. For å få dispensasjon er det eit vilkår at ein kan snu og manøvrera på eigen eigedom, heiter det i brevet. I tillegg fekk han beskjed om å søkja om utvida bruk til lagring og opplagsplass for den nesten attgrodde landbruksavkøyrsla.
– Etter synfaringa i dag ser eg at opplagsplassen er vesentleg utvida dei siste åra. Ut frå dine opplysningar er det ikkje gjeve løyve frå kommunen til dette tiltaket, heiter det i brevet.
Planane om rubbhall har eigaren forkasta, ifylgje brevet. Fylkeskommunen er positiv til utvida bruk av avkøyrsla, men før fylkeskommunen kan gjera vedtak, må eigaren avklara med Ullensvang kommune om fyllinga på området er søknadspliktig etter plan- og bygningslova. I brevet står det at fyllinga kan vera søknadspliktig fordi ho ligg innanfor ei forbodssone langs sjø og vassdrag, og på grunn av høgda og volumet.
