Vil ha dagsturhytter i Ullensvang: – Ein gåvepakke
Kommunestyret i Ullensvang ønsker å føra opp tre dagsturhytter, éi i kvar av dei gamle kommunane. Førre veke vedtok politikarane samrøystes å søka om støtte frå Vestland fylkeskommune og Sparebankstiftinga Sogn og Fjordane.
Kultursjef Else Marie Sandal sa ho hadde gledd seg veldig til å presentera saka.
Artikkelen held fram under annonsen.
– Det er ei spesiell ramme, men verda og livet skal gå vidare etter koronaviruset. Dette er ei gladsak og ei gåvepakke frå fylkeskommunen, sa ho.
Sandal fortalde at det i utgangspunktet var planlagt å ha innspelsmøte om plassering i ulike grender i kommunen, men desse kan ikkje avviklast på tenkt måte.
Hyttene vil trenga at lokale lag eller organisasjonar tek seg av dagleg drift.
Tilsvarande hytter er bygde i alle kommunane i tidlegare Sogn og Fjordane.
Vestland fylkeskommune har lyst ut eit felles anbod for nye hytter i alle kommunane i tidlegare Hordaland. 19. mars var anbod frå fem entreprenørar godkjende. Fristen vart utsett frå 20. til 27. mars som følge av koronaviruset. Vinnar vert kunngjort i midten av april.
