Vil ha badestove ved båthamn
– Er det mogleg å få etablert ei badestove på Tangeråsneset, i nærleiken av båthamna?
Det spør Olav Sletvold rådmannen om på vegner av ei interessegruppe med «godt vaksne personar».
Badestova skal vera tilgjengeleg for ålmenta. Viss det vert noko av, vil det verta skipa eit eige lag som skal stå for bygging og drift. Både ei flytande badestove og ei på land har vorte diskutert. Gruppa har starta ein dialog med båtlaget om den flytande løysinga, men ser at denne løysinga kan skapa ein interessekonflikt med dei andre brukarane av sjøflata på Tangeråsneset.
Gruppa ynskjer å avklara med heradet om det kan vera mogleg å laga ei badestove på land. Ho har funne eit område nordaust for grillhytta som kan høva. Stova er tenkt reist på søyler, med gangrampe ned i sjøen.
Interessegruppa er innforstått med at må ha godkjenning etter plan- og bygningslova.
– Spørsmålet i denne omgang vert om heradet vil leiga bort areal til føremålet, skriv Sletvold.
