Vil gjera som Imdi ynskjer

I tillegg til desse kjem eventuell busetjing av personar som får løyve til såkalla familiegjenforeining.

Talet 40, som rådmannen rår heradsstyret til å vedta 7. februar, er i tråd med den offisielle oppmodinga frå Integrerings- og mangfaldsdirektoratet.

Heradsstyret vedtok i samband med budsjetthandsaminga 12. desember å ta imot 40, men i det talet var også familiegjenforeining inkludert.

Ifylgje rådmannen er det danna ei tverrfagleg arbeidsgruppe som skal sikra betre integrering og «arbeidsretting» i flyktningarbeidet. Arbeidet har vist kor viktig god norskopplæring er.

Rådmannen føreslår difor å leggja til rette for 12–15 språkpraksisplassar i kommunale tenester.

– Fleire kommunale einingar melder om utfordringar med å yta tenester, ikkje berre med grunnlag i knappe økonomiske ressursar, men også at det er vanskar med å skaffa kvalifisert personell, eigna språktreningsplassar og husvære der det er kapasitet i barnehage og skule. Busetjingstalet for Kvam bør vera realistisk med tanke på kvalitet i tenestetilbodet og bustadmarknaden. Det må vera kvalitet i integreringsarbeidet, skriv rådmannen.

Særleg mangelen på fagfolk i oppvekstsektoren, ikkje minst pedagogar, er ei utfordring. Heradet har heller ikkje eigne bustader til flyktningar, så det er omfattande arbeid å finna eigne bustader til dei. Dei fleste ynskjer å bu sentralt i Kvam på grunn av avstandar og manglande kollektivtilbod.

På grunn av dårleg plass på skulane i Norheimsund og Øystese bør nye grunnskuleelevar få plass i dei andre bygdene, men det kan utløysa trong for fleire stillingar, varslar rådmannen. Når det gjeld barnehage, er det ledig plass i Tørvikbygd og Ålvik.

Rådmannen minner om at flyktningane er ein ressurs, og at Kvam har eit samfunnsansvar. Difor bør kvemmingane strekkja seg for å ta imot dei Imdi ynskjer. Samstundes varslar ho at heradet truleg vil måtta avvisa nokre.

I fjor busette Kvam herad 42 flyktningar, mot 48 året før. Vedtaket i fjor var å busetja 45. Heradet takka nei til nokre «fordelingar» på grunn av mangel på kapasitet til særs ressurskrevjande brukarar og manglande husvære.

Formannskapet drøftar saka fredag 31. januar, før heradsstyret altså tek avgjerd fredag 7. februar.