Vil gjera Øystese til ein timinuttarsby

Det meiner representantar for Øystese Utvikling AS, som tysdag presenterte siste utgåve av masterplanen for Øystese for kring nitti frammøtte på Hardangerfjord Hotel.

Ambisjonen med planen er ifylgje dagleg leiar i selskapet, Hans Jørgen Andersen, å visa ei mogleg utvikling som gjer Øystese så attraktiv at fleire ynskjer å flytta til bygda, og som tek høgd for ein vekst i folketalet på 50 prosent til om lag fire tusen. Undertittelen til planen er «der ein skulle tru at alle ville bu».

– Dess meir attraktiv tettstaden er, dess fleire vil flytta dit. Øystese kan verta ein av dei kjekkaste stadene i Noreg, sa Andersen.

Tettare, grønare sentrum

I møtet vart det mellom anna lagt fram ulike tilnærmingar til god tettstadutvikling, og kva som må til for at Øystese skal verta ein såkalla timinuttarsby — at alt ein treng i kvardagen, skal vera innan ein gangavstand på ti minutt. Det føreset at bygningsstrukturane er relativt tette, med ei god blanding av funksjon og føremål, står det i planen.

Eit av tiltaka som er nemnde, er å gjera grøntareal mest mogleg tilgjengeleg for dei som oppheld seg i bygda. Dette skal ifylgje planen auka trivnaden i og merksemda kring Øystese. Å nytta området på Mikkjelsflaten til å byggja eit park- og hageanlegg kan vera med på å sikra meir grøntområde, hevda Andersen. Anlegget kan til dømes innehalda parsellhagar, leikeområde og faste utemøblar. Det er også føreslege å opna opp Øyrabekken for å få inn sjøauren.

– Vert dette gjort skikkeleg, vert det ein attraksjon i seg sjølv, sa Andersen.

Det er sett nærare på korleis området mellom Hardanger Skyspace og Hardangerbadet kan nyttast best mogleg. Både offentlege og private krefter er allereie godt i gang med planar for grøntområdet. Det var prosjektet Livoglyst i Øystese som fyrst tok tak i saka og fekk med seg Kvam herad på laget. Seinare har sivilingeniør Kjetil Kvittingen i Arkoconsult AS utvikla planane vidare. Det vert føreslege ein aktivitetspark som skal byggjast med liknande materialar og formspråk som Hardanger Skyspace for å vareta stilarten.

Skaffa meir land

Ei flytting av heildags- og arbeidsparkeringa til randsona av sentrum kan frigjera areal til andre føremål. Flyttinga vil gje eit tydelegare sentrum, ifylgje Andersen.

Ei arbeidsgruppe har sett på kvar det er mogleg å nytta utfyllingsmassar som kan gje meir land. Ifylgje henne kan utfyllingane nyttast til bustader, næringsverksemder, ladeanlegg til båthamn eller andre tilbod. Gruppa har kartlagt strekkja frå Laupsa til Børvenes, og ser moglegheiter mellom anna på Laupsa, framføre Vikelandet og frå Notanes til Havnen.

Andersen påpeika at det er fleire tunnel- og rassikringsprosjekt i vente, og at desse kan gje massar til utfyllingar. Han understreka at godt planlagde prosjekt og tiltak vert prioriterte, og at det difor er naudsynt med langsiktig planlegging. Slike prosessar tek tid, understreka Andersen, og viste til at det gjekk kring 13 år frå formannskapet vedtok planarbeid på Stronde til fyrste innflytting.

– Få ut tungtrafikk

Medan bustader og tenester skal vera lett tilgjengelege i sentrum, bør ein få vekk tungtrafikken. For å lukkast, bør enkelte industriverksemder flyttast til ei eiga sone eller til lokalitetar som tolar støy-, støv- og luktplagene flyttinga medfører, ifylgje Andersen.

Gjennom kartsøk har det ikkje lukkast å finna nye område som eignar seg for industriføremål utover det som allereie inngår i gjeldande reguleringsplanar, opplyste Andersen. I masterplanen vert utvikling av mellom anna masseuttaket i Tolomarka og steinbrotet på Skålheim nemnde som alternativ, men då lyt noko gjerast med tilkomstvegane, understreka seniorkonsulent Vidar Østerbø i Norconsult AS.

Østerbø nemnde særskilt to av innspela til veg til Skålheim: eitt frå Krossen via Bjørketeigen, Nobbo og inn på eksisterande fylkesveg, og eitt frå Krossen, via Bjørketeigen, Borge og vidare til Skålheim. Stigingsforhold, vegbreidd og krappe svingar er noko av det ein må ta omsyn til, forklara han.

Eit levande dokument

Masterplanen er tenkt å vera eit godt grunnlag for innspel til fyrst områdeplanen, seinare til revisjonen av kommuneplanen. Styreleiar Dag Jarle Aksnes oppmoda dei frammøtte om å gå gjennom planen og arbeida vidare med han.

– Det er no dokumentet skal byrja leva, sa han.

Ifylgje Aksnes vil Øystese Utvikling rullera planen i tre år. Endringar vil vera eit resultat av både eigne vurderingar og innspel frå andre.