Strandebarm Båtlag har søkt kraftfondet i Kvam herad om 100.000 kroner til bygging av eit sørvisanlegg. Anlegget skal vera retta mot småbåttrafikken og på lengre sikt mot bubilar.
Fasilitetane skal innehalda toalett, varmtvasstank, dusjkabinett, vaskemaskinar, tørketromlar, minikjøkken og tømestasjon for septiktankar.
Laget samarbeider med Strandebarm Idrettslag og Strandebarm grendeutval om prosjektet.
Båtlaget skriv at Strandebarm Marina har utvikla seg til ei større gjestehamn enn ein nokon gong hadde sett for seg, med over 40 båtar som overnatta på eitt tidspunkt.
Målet med anlegget er å utvikla marinaen til ei attraktiv gjestehamn og å leggja til rette for friluftsliv og båtturisme på Hardangerfjorden, heiter det i søknaden.
Tiltaket er i tråd med reguleringsplanen, opplyser båtlaget. Båtlaget opplyser at det stiller med ein andel grunn og bygg på 986.000 kroner. Heile sjøaktivitetssenteret har ei kostnadsramme på om lag 7,4 millionar kroner.
