Vil gje to millionar kroner til drift av Helse i Hardanger

Ifylgje søknaden skal pengane gå til bedriftsutvikling og ein ny fase i satsinga. Målet er å få på plass permanent finansiering av aktivitetane til Helse i Hardanger AS (HIH) i Øystese. I alt vert det budsjettert med driftskostnader på 15 millionar kroner i året dei neste tre åra.

Ifylgje budsjettet skal pengane gå til driftskostnader som løn og kjøp av tenester og varer. Dei politisk vedtekne føringane for bruk av fondet opnar ikkje for å finansiera ordinær drift, og den årlege ramma for tildeling frå fondet er to millionar kroner.

Likevel vil rådmannen yta to millionar kroner til prosjektet, attåt ei rekkje andre løyvingar i år. Ho viser til at det er mogeleg å gje ekstraordinære tildelingar til særskilde prosjekt, og meiner søknaden kan plasserast i denne kategorien som eit viktig og spanande forskings- og utviklingsprosjekt. Tidlegare har Hardanger og Voss museum fått ei ekstraordinær løyving til satsinga Tett på i Norheimsund.

HIH tok imot dei fyrste pasientane i 2020. Prosjektet er finansiert gjennom eit spleiselag der mellom andre Trond Mohn, Innovasjon Noreg og Haukeland universitetssjukehus har vore med. I alt er det investert 37 millionar kroner. Nær 400 pasientar med kroniske helseplager i fleire kategoriar har fått behandling. Ifylgje søkjaren er prosjektet vellukka og resultata gode.

– Me kjenner ikkje til noko fagmiljø som kan visa til like gode resultat for desse pasientgruppene, skriv HIH i søknaden.

Føretaket trur at det innan tre år kan vera permanent finansiert. Vona er å få driftsstønad frå fleire andre kjelder.

Sjølv om løyvinga er halvparten av det søkjaren ynskjer, minner rådmannen om at det er mogeleg å søkja igjen i 2024. HIH har tidlegare fått 675.000 kommunale kroner i stønad.

Formannskapet drøftar saka 2. november. Heradsstyret tek avgjerd 8. november.