Vil gje pengar til Tokagjelet-tunnelen i 2025
Samarbeidspartia set av pengar til å setja i gang arbeid med tunnelen forbi Tokagjelet komande år.
50 millionar kroner vert sette av til å setja i gang med prosjekteringsarbeid og andre naudsynte prosessar komande år. Dei neste åra er det lagt opp til ei opptrapping til høvesvis 150, 200 og 200 millionar kroner i dei tre åra 2026–2028. Målet er å finansiera ein stipulert samla kostnad på 3,5 milliardar kroner.
Samstundes føreslår fleirtalet å setja i gang arbeid med tunnel mellom Nordrepollen og Austrepollen året etter, også her med ei økonomisk opptrapping i dei påfylgjande åra. Her er summane 40 millionar kroner i 2026, 70 millionar i 2027 og 140 millionar i 2028.
Pengane til prosjekta, som supplerer eit tredje prosjekt ved Heilevang med oppstart i 2025, vert finansierte med øyremerkte pengar til skredsikring i bundne fond.
Fylkestingsmedlem og jondøling Sigrid Brattabø Handegard (Sp) presenterte framlegga i finansutvalet måndag føremiddag.
Ho seier til HF at fleirtalet forventar og legg opp til at staten må vera med på å finanisera samferdsleprosjekta på fylkesveg 49 med minst halve kostnaden, sidan dei er del av den valde strekninga for «arm» frå E134 til Bergen.
Reguleringsplanframlegga for dei to tunnelane er varsla i fyrste halvår 2025. Handegard seier at fylkeskommunen må ha fullt trykk på planarbeid og samstundes ha dialog med regjeringa om medfinansiering og med kommunane om bompengefinansiering.
– Sikring av liv og helse, og trygge og tenlege kvardagsvegar, er målet vårt. Me er opptekne av å setja skredsikringskronene i arbeid og spaden i jorda, seier ho.
