Vil gje eplemask til dyrefôr
Siderklynga Hardanger ynskjer å samkøyra handteringa av det som vert att etter siderproduksjonen.
Det går fram av ei pressemelding frå klyngja, som har 24 siderprodusentar som medlemer. To av dei – Sjuragarden og Spildegarden – held til i Kvam.
Klyngja søkjer potensielle samarbeidspartnarar som er interesserte i å nytta eplemask til dyrefôr eller andre aktuelle bruksområde. Det er eit ledd i meir berekraftig produksjon og betre utnytting av frukta.
Enkelte av produsentane i klynga har alt inngått samarbeid med bønder, men ein ynskjer meir samkøyring internt, slik at ein kan samla opp mask hjå både små og store siderprodusentar, seier dagleg leiar i Siderklyngja Hardanger, Anna Gursli Langesæter.
Eplemask er det som er att av eple som er pressa til most. Det inneheld restsøte, fiber og protein og er ein god, rik miks til dyrefôr.
– Men skal me klara å nytta dette avfallet, må me etablera mottakarar, og logistikken må på plass, seier Langesæter.
– Siderklynga har heile vegen fronta samarbeid og felles utvikling – både innover i bransjen og med andre. Det er dette som er formelen for vidare suksess. Dette er ei ny, felles satsing som me håpar fleire vil vera med på, seier Langesæter.
Hovudmålet til klyngja er å skapa eit forpliktande samarbeid mellom bedrifter som skal skapa ny næring og auke i verdiskaping, ifylgje nettstaden. Siderklynga Hardanger vart initiert av Hardanger Siderprodusentlag, Innovasjon Noreg, Hordaland fylkeskommune, Fylkesmannen i Hordaland og lokalt næringsliv.
