Vil fylla i sjøen i Jondal sentrum

Det spørsmålet har Statsforvaltaren stilt, ettersom han ikkje er nøgd med ein reguleringsplan der svaret manglar. Han fremja, mellom anna på grunn av dette, motsegn til planen.

I kjølvatnet av eit meklingsmøte om saka i oktober, og eit oppfylgingsmøte i november, har kommunen gjort jobben med å laga ein grov analyse som syner kvar steinmassar frå fjellhallane kan nyttast:

• Fylling i sjøen for å byggja kai ved det planlagde næringsområdet i Tryglavik: 180.000 kubikkmeter.

• Gang- og sykkelveg frå Jondal til Sætveithagen: 20.000 kubikkmeter.

• Fylling i sjøen sør for ferjekaien og Spar-butikken i Jondal sentrum for å betra logistikken og tilhøva for næringslivet i området: 20.000 kubikkmeter.

• Kinsarvik sentrum: 200.000 kubikkmeter.

• Utbetring og bygging av 7,5 kilometer gang- og sykkelveg på vestsida av Sørfjorden: 150.000 kubikkmeter.

Samla vert dette 570.000 kubikkmeter. Den kalkulerte mengda med disponible massar frå smoltprosjektet er 750.000 kubikkmeter. Dei 180.000 kubikkmetrane som står att, kan skipast ut eller nyttast i andre prosjekt i Ullensvang eller nabokommunar.

Ingen av dei skisserte prosjekta er del av ein arealplan. Det er såleis uvisst når massane eventuelt kan nyttast. Arbeidet med planlegging i Tryglavik og Jondal sentrum er i gang, medan det ikkje er sett i gang arbeid med gang- og sykkelveg mellom Jondal og Sætveithagen.

Også vassinntak og -utslepp ved smoltanlegget uroa Statsforvaltaren. Ho ottast at resipienten ikkje vil tola så store utslepp som det er snakk om i denne saka, og etterlyste difor betre utgreiingar bruken av vassressursar og fylgjene for miljøet.

Svaret frå tiltakshavar Hardanger Fishfarm AS er ei utgreiing der spreiinga av utsleppa frå Torsnes er modellert.

Føretaket har i tillegg levert reviderte plandokument.

Møtet i november er ikkje dokumentert i arkivsaka. HF har bede om innsyn i denne dokumentasjonen, men ikkje fått tilbakemelding frå kommunen enno.