Vil framleis ha omstridd båt

Beredskapsbåten til Kvam brann og redning vart tinga i fjor haust og skulle vore levert i sommar. Enno har ikkje skroget til båten til 2,7 millionar kroner kome frå Ungarn til leverandøren i Sverige.

Rådmannen har trass utsetjingar nytta høvet korkje til å krevja dagmulkter eller til å prøva å kansellera kjøpet, som eit samrøystes heradsstyre vedtok i juni 2023. Ho har i staden vist til at ho må fylgja opp vedtaket om investeringa.

Kansellert vert kjøpet i fyrste omgang ikkje. Fleirtalskoalisjonen – Ap, Frp, V og KrF – grip ikkje inn i saka. Det vart klart då 2025-budsjettet vart vedteke torsdag 12. desember.

Ein samla opposisjon føreslo derimot å heva handelen, svelgja eit tap på nær 0,3 millionar kroner og investera like mykje i ein mindre båt med tilhengar. Det var eit av mange framlegg i det alternativet budsjettet.

– Raude lys

Arne Sandven (H) sa på talarstolen at dialogen mellom Kvam herad og båtleverandør Kampetorp Marin AB rommar ei rekkje «raude lys» i form av brotne lovnader og tynne forklaringar. Etter hans syn kan ikkje argumenta for utsetjinga som kjem fram i korrespondansen, skildrast som såkalla force majeure, slik rådmannen nyleg konkluderte med i eit notat til dei folkevalde. Han trur difor at heradet vil ha ei god sak dersom kjøpet vert heva.

26. november vart ei lang rekkje dokument frå den om lag eitt år lange dialogen med leverandøren journalførte, etter at HF hadde bede om innsyn i alt. Ein «rutinefeil» låg bak den manglande dokumentasjonen, ifylgje rådmannen.

Sandven trur at utviklinga i saka kunne ha vorte annleis om heradet hadde offentleggjort informasjonen før, slik at dei folkevalde kunne ha vore klar over kva som gjekk føre seg mellom administrasjonen og seljaren i Sverige.

Sandven viste til at politikarane har spurt om status i saka før, mellom anna i budsjettet i fjor. Ifylgje han var svaret då at det var for seint å kansellera kjøpet.

– Eg ser i korrespondansen at det var ikkje for seint, sa han.

Rådmannen kommenterte ikkje påstanden.

– Ser manglar i ettertid

Sjølv om handelen ikkje vert forsøkt stoppa, var heller ikkje fleirtalskoalisjonen utan kritiske merknader. Varaordførar Frode Nygård (Frp) meiner at investeringa vart godt greidd ut i samband med den omfattande investeringssaka i 2023, men også han etterlyste meir innsyn og betre tilgang på informasjon til politisk nivå undervegs i prosessen.

Han meiner dessutan at analysen av kostnader og behov kunne ha vore betre. På den andre sida er det komplisert å analysera beredskapsutstyr i eit kost- og nytteperspektiv, påpeika han.

– Eg har forståing for at innbyggjarane stiller spørsmål om slike ting. Eg må innrømma at eg ikkje har gode svar om alt som er kjøpt, sa Nygård.

Han ottast særleg kor mykje driftskostnadene vil auka som fylgje av investeringane. I ettertid ser Nygård at det kom for dårleg fram då saka vart handsama i fjor.

– Er verdfullt

Bjørgulv Hauger (Frp) hadde ein litt annleis innfallsvinkel. Han fortalde at han var med på leiteaksjonen etter ei båtulukke der tre omkom i Kvam i 1994. Arbeidet den gongen verka tilfeldig og lite koordinert, og var basert på privat innsats, sa han.

Seinare vart Hauger sjømann og arbeidde med søk etter sakna og omkomne på profesjonell basis. Då såg han verdien av god leiing og tilpassa utstyr for å sikra profesjonelle og verdige rammer for leiteaksjonar.

– Eg er glad for at Kvam herad snart skal få ein profesjonell beredskapsbåt med utdanna personell, sa Frp-politikaren.

Sandven minte om at ingen har protestert på opplæringa som er gjeven, med ein kostnad på ein halv million kroner. Han meiner dessutan at ein kan sikra profesjonalitet også med ein enklare og billegare type båt enn den farkosten som er tinga.

Trong for meir

Før budsjettdebatten opplyste rådmann Anita Hesthamar at Kvam, i tillegg til båten til akutte hendingar, kan trenga ein eigen båt til evakuering, legetransport og ymse annan skyss i samband med til dømes ekstremt vêr og stengde vegar.

Dette temaet skal administrasjonen ha arbeidd breitt med i haust, i samband med ein heilskapleg risiko- og sårbarheitsanalyse.

Ifylgje rådmannen har det vore dialog om samarbeid med både Lingalaks AS og Raudekrossen. Vona er å få på plass ein avtale om ei «pilotordning» som gjeld kommunal bruk av båten til sistnemnde organisasjon før jul. Båten ligg i Bergen og heiter «RC Bjørgvin».

– Dette er ikkje ei erstatning for beredskapsbåten, men eit tillegg for å vareta andre behov, sa rådmannen i heradsstyremøtet.

Ordninga vart drøfta i eit møte om såkalla omsorgsberedskap med både lokale og regionale representantar for Raudekrossen 20. november. Ifylgje referatet frå møtet kan organisasjonen tilby Kvam herad å bruka båten som lokal beredskap ved behov eller under aksjonar, med økonomiske gunstige vilkår. HF bad 16. desember Kvam herad om innsyn i eit avtaleutkast som skal vera sendt til heradet, men ikkje ligg i arkivsaka, pluss fleire andre dokument som manglar i den same saka.

Beredskapsbåten som er tinga, er ifylgje henne tilpassa eit mannskap på sju for å stetta dykkarforskrifta, men han skal ha plass til i alt 18 personar om bord. Båten skal kunna nå 60 prosent av ibuarane i Kvam innan ti minutt.

Du kan lesa meir om budsjettdebatten i HF seinare.