Vil forska på sauerap for å gjera den meir miljøvennleg
Jordbruket står for 8,8 prosent av norske klimagassutslepp, viser tal frå Miljødirektoratet. Ein stor del av utsleppa kjem frå fordøyinga til dyr. Avlsteknologi frå New Zealand skal no bidra til å få ned metanutsleppa.
– No ønskjer vi å sjå om vi kan driva avlstiltak for å få ned metanutsleppet, seier Thor Blichfeldt, avls- og seminsjef i Norsk Sau og Geit til NRK.
På New Zealand vert det drive eit avlsprogram for å avla fram sauer som slepper ut mindre metan, ifølgje The Guardian. I 2013 slo ein forskar i landet fast at metanraping hos sau er arveleg.
Med teknologien frå New Zealand skal Norsk Sau og Geit reisa rundt i landet og måla utslepp frå sauer. Dei ønskjer å finne ut om mengda metangass som blir sleppt ut, har med genar å gjere. Fram til februar neste år skal dei måle om lag 3.000 dyr på 60 gardar i landet. Resultatet kjem om to år.
– Etter to år må vi ha gjort opp ei meining om kor bra dette her er, og då håpar vi det er sånn at vi kan ta det inn i det vanlege avlsarbeidet saman med dei andre eigenskapane vi legg vekt på, seier Thor Blichfeldt.
