Vil formalisera oppdrettslager i sjøen ved Horggjona

Lokaliteten er ikkje i bruk. Lingalaks konkluderte i ei vurdering av fleire lokalitetar med at Horggjona, aust for Eide og sør for Straumasteinen, eignar seg best til lagring av ein fôrflåte og nokre merdar.

Frå 2006 til 2012 vart det drive med fisk i merdane på lokaliteten. Sidan har arealet vore nytta til lagring av utstyr, men fyrst nyleg vart det søkt om løyve til arealbruken.

– Dyrt og arealkrevjande

Lingalaks har søkt Kvam herad om dispensasjon frå kommuneplanen. Planen er å nytta området permanent til lagringsareal, men med skiftande utstyr som merdar og fôrflåte. Utstyret skal lagrast fram til det er bruk for det på ein lokalitet. Lagring på land vil vera mindre fleksibelt med tanke på logistikk, kostesamt, svært arealkrevjande og uheldig for utstyret.

Området er i motsetnad til før hausten 2019 ikkje sett av til akvakulturføremål i kommuneplanen, påpeika heradet i eit møte med verksemda 30. november. Heradet bad difor Lingalaks om å vurdera å nytta eit område som allereie er sett av til akvakultur. Alternativt måtte det søkjast om dispensasjon ved Horggjona. Lingalaks valde altså sistnemnde løysing.

I eit møte med heradet 23. februar gjekk Lingalaks gjennom dokumentasjonen verksemda hadde sendt. Heradet orienterte om prosessen Lingalaks må gjennom for å få eit løyve etter plan- og bygningslova. Det må òg gjerast eit vedtak etter hamne- og farvasslova, opplyste heradet.

Heradet har elles påpeika at tiltaket ligg tett opptil hovudleia til Hardangerfjorden.

Fleire innvendingar

Hovudleia er også Kystverket oppteke av. I ei fråsegn i sommar konkluderer Kystverket med at det vil vera «særs uheldig» å lagra utstyr som kan vera til fare for skipstrafikken. Kystverket viser til at grunngjevinga for søknaden er at det er dyrare og meir arealkrevjande å lagra utstyret på land, og at sjølagring gjer logistikken enklare.

– Kystverket vil ikkje tilrå heradet å gje dispensasjon med bakgrunn i økonomiske omsyn, heiter det i fråsegna.

Fiskarlaget vest viser til at flyfoto syner at området har vore nytta til lagring av utstyr lenge, og at det såleis ikkje er snakk om mellombels bruk. Laget viser til at det i fjor bad om at anlegget vert fjerna, og meiner ein bør lagra utstyret på land.

Statsforvaltaren meiner det vil vera særs uheldig å godta eit permanent utstyrslager. Det kan gje uheldige verknader for natur, friluftsliv, fredsle og fiske, og kan skapa presedens, ifylgje fråsegna.

Også Fiskeridirektoratet har uttala seg i saka. Direktoratet meiner tiltaket ikkje vil koma i konflikt med fiskeriinteresser, men påpeikar at fortøyingane ikkje vil koma i konflikt med fortøyingane til anlegget på lokaliteten Vikane 1 i Jondal. Det må vera mogeleg å utvida anlegget, krev direktoratet.

– Målet er gjenbruk

Lingalaks har fått mogelegheit til å kommentera fråsegnene før saka vert handsama politisk. Verksemda er jamt over usamd i innvendingane som er komne. Ho viser til at lagringa vil skapa minimalt med aktivitet samanlikna med ein lokalitet i drift.

Oppdrettaren poengterer igjen at verksemda ikkje har andre lokalitetar som er eigna til lagring av utstyr, mellom anna på grunn av eksisterande aktivitet eller for lite areal. Lagring på land vil krevja eit tett og og musefritt bygg på 28.000 rutemeter og kan skapa utfordringar med lukt og smittevern, heiter det.

Verksemda viser til at søknaden er basert på berekraftig bruk av sjøbasert utstyr. Målet er gjenbruk av materiell som er for godt til å kassera. Utstyret har vore lagra nær hovudleia i fjorden utan hell. Verksemda har instruksar og system som skal gjera det mogeleg å førebyggja eller oppdaga uhell som slitasje og havari tidleg. Dagleg får lokaliteten tilsyn, opplyser Lingalaks.

Avstanden mellom det aktuelle lagerarealet og hovudleia er 440 meter, og fjorden er over to kilometer brei. Det bør såleis vera rom for å passera, meiner verksemda, som meiner at også potensielle konfliktar med Vikane 1 kan hindrast med godt samarbeid.