Vil fjerna tre på stranda

Gauden bur på Norheim og har god utsikt mot stranda. I mange år har han tenkt at trea er altfor store. No meiner han det er på tide å ta tak i problemet.

– Det irriterer meg at trea skuggelegg stranda, seier Gauden.

Skuggane fører til at fleire trekkjer vekk frå stranda. Gauden viser til stranda i Øystese som eit eksempel på korleis det bør vera. Ifølgje han er der yrande folkeliv frå morgon til kveld på fine sommardagar.

– I Norheimsund forsvinn folk på grunn av skuggane. Det er synd, seier Gauden.

Fleire er positive

Sjølv brukar han ikkje stranda mykje. Ifølgje han handlar prosjektet om å gjera det kjekkare for heile lokalsamfunnet.

Gauden har lagt ut eit facebookinnlegg der han forklarer situasjonen. 1. august hadde innlegget fått 74 kommentarar. Dei fleste er positive til å fjerna eller skjera ned nokre av trea.

– Det er tydeleg at fleire tenkjer det same som eg, fortel Gauden.

Gauden har nummerert trea frå ein til fem, der nummer ein står nærast Hardanger Brygge.

Han har kome med ulike alternativ til kva tre som bør stå og kva som bør hoggast. Det siste forslaget er å hogga nummer tre og fire.

– Då får ein eit kompromiss for dei som vil ha sol og dei som vil ha skugge, seier Gauden.

Ikkje så gamle

Nokre meiner ein bør ta vare på slike gamle tre. Gauden har undersøkt historia til strandtrea.

– Dei er ikkje spesielt gamle – dei er berre store, fortel han.

Flyfoto frå 1993 viser ei rekkje med ti små tre på same stad. Talet har vorte redusert etter kvart som trea har vakse og stranda har utvikla seg.

– No meiner eg det er på tide å opna opp meir, seier Gauden.

Han har sendt ein søknad til Kvam herad, og ventar på svar. Viss han får løyve, vil Gauden samla ein dugnadsgjeng med erfarne folk til å gjennomføra hogsten. Eit anna alternativ er at heradet tek saka i eigne hender. Det er også mogleg at alle trea vert verande som dei er.

– Ynskjer langsiktig plan

Heradsgartnar Henning Huse har merka seg diskusjonen, og sjølv tenkt på skjering av dei aktuelle trea ved fleire høve. Diskusjonen er god, men han må, som mangt anna i offentleg sektor, handsamast ut frå fleire perspektiv, skriv han i ein e-post til HF.

– Eg ynskjer ein langsiktig plan for parktre i kommunen, då eg meiner at parktrea har både ein estetisk og ein kulturell verdi. Mange av trea i kommunen er levande historiske bautaer som generasjonar har – og vil få – eit forhold til. Dess eldre, dess større verdi etter mitt syn, skriv Huse.

Ein langsiktig plan vil krevja ekstra ressursar og tid utover det han rår over i dag. Og det er ikkje berre å skjera. Ved «hard» skjering over eitt år vil ikkje treet få ein fin utsjånad, og det kan i verste fall døy heilt ut, opplyser han. Skjering bør skje over fleire år. Med det sagt så er han langt frå ueinig med Gauden. Tanken er god, synest Huse, som er samd i at det ein bør vurdera å fjerna eitt eller fleire tre.

– Her kan grendeutval, næringslag og andre gjerne engasjera seg. Parkane i bygdene har svært stor verdi, og er mykje brukte av tilreisande og bygdefolk, skriv heradsgartnaren.