– Vil endra forskrift om byte av skule
– Elevar som flyttar mellom ulike skulekrinsar i heradet, skal kunna halda fram på den skulen dei allereie går på om dei sjølve eller foreldra deira ynskjer det.
Det meiner heradsstyremedlem Bjarte Helland. Han meiner dessutan at ein skal kunna søkja seg inn på grunnskule i den skulekrinsen ein har gått i barnehage, uavhengig av kvar ein bur.
Det kjem fram i ein interpellasjon til heradsstyremøtet 25. september.
Endringane kan styrkja det sosiale nettverket og kontinuiteten for barnet, og vil i mange tilfelle gje barnet ein trygg og kjend overgang til skulen, meiner Helland. Dei vil òg leggja til rette for ein meir fleksibel og tilpassa skulekvardag. Dette er særleg viktig i ei tid der trivnad og tryggleik er sentrale faktorar for god læring, står det i grunngjevinga.
Interpellasjonen er signert Kvam INP ved Bjarte Helland 17. september. Som HF nyleg skreiv, vart Helland ifylgje Bergensavisen ekskludert frå INP i sentralstyremøtet i partiet torsdag 19. september. Sjølv meiner Helland at vedtaket er ulovleg.
