Vil endra fartsgrense
Kvam herad ynskjer å skilta med soneskilt på Fykse, slik at fartsgrensa kan omfatta heile området.
Ynsket om endring kjem av at nokre skilt manglar gyldig vedtak i grenda. Det har kome fram når Kvam herad har revidert skilt på vegnettet. Det er ifylgje Kvam herad skilta i strid med forskrifta, og skiltinga samsvarar ikkje med vegkartet.
Eit 30-skilt står i dag står litt før du kjem til det tidlegare grendehuset på Fykse. Det skiltet er det ikkje gjort vedtak om, og ifylgje vegkartet er fartsgrensa på Bjørkevegen 50 kilometer i timen, skriv rådmannen til Vestland fylkeskommune.
Bjørkevegen er i nedre del tett busett og har fleire avkøyrsler. Det er dessutan dårleg sikt til avkøyrslene og smal og trong veg. Difor meiner Kvam herad at det er fornuftig med ei fartsgrense på 30 kilometer i timen.
Fylkeskommunen har sagt seg einig og bede Statens vegvesen om å sende saka på høyring og gjera vedtak. Ei endring til sone vil gjera det oversiktleg for dei køyrande, samstundes som det vil omfatta dei andre vegane òg, ifylgje fylkeskommunen. Han meiner sona har rimeleg storleik og at området er naturleg avgrensa.
