– Vil du sjå pumpestasjonen min?
Onsdag 18. desember vart ålmenta invitert til ein opningsfest litt utanom det vanlege på Tolo.
Vegar, barnehagar og skular vert gjerne opna med brask, bram, kaker, høge stettar og ordførarkjede. Meir sjeldsynt er det at kakene vert baka og kaffien sett på kok for ein ny spillvasspumpestasjon.
Nett det hende på Tolo 18. desember. Då feira Kvam herad at anleggsarbeidet som har ført til lysregulering og redusert framkome for både gåande og køyrande i området, er overstått.
Med på markeringa var mellom andre leverandørar og driftsoperatørar. Dei fekk oppleva prosjektleiar Erling Eid «levera» stasjonen til driftsleiar for vatn og avløp, Silje Hausberg Tjosås, ifylgje den kommunale heimesida.
Heradet opplyser at arbeidet har vore utfordrande fordi korkje fylkesvegen eller leidningsnettet kunne stengjast. I tillegg har det vore naudsynt med presise utrekningar og målingar for å få rett fall.
Medrekna prosjektering har det teke kring to år å reisa stasjonen.
– Eit utfordrande sprengingsarbeid er utført utan skade, og djupe grøfter og grop til pumpestasjonen er utført av dugande maskinførarar i Kvam Maskin & Transport, skriv heradet.
Stasjonen er 8,5 meter djup, og botnen ligg ein knapp meter under havnivået. Han har eit eige maskinrom for å sikra tryggleiken og arbeidsmiljøet til dei tilsette. Han rommar to pumper med ein effekt på 22 kilowatt, og er forsynt med straum frå ein ny transformatorstasjon som er lagd til rette for vidare utbygging i området. Det nye utstyret reduserer straumkostnaden med om lag ein tredel.
Stasjonen, som saman med utskifting av tilhøyrande leidningsnett kostar 17 millionar kroner, er ein av 28 i det kommunale hovudspillvassnettet. Dette nettet flyttar avløpsvatn frå Kvamskogen og Norheimsund til reinseanlegget på Notanes i Øystese. Den gamle stasjonen burde vore bytt for fleire år sidan, melder kvam.no.
Budsjettet sprakk, ifylgje heradet på grunn av uventa dårleg tilstand i leidningsnettet i området. Rekninga får alle abonnentane, ettersom tiltak på vass- og avløpsfeltet skal dekkjast med gebyr.
– Gjennom prosjektet har heradet, fylkeskommunen og private utbyggjarar samarbeidd og bidrege for å sikra kapasitet og flaumsikring for framtidig utbygging. Ekstra røyr er lagde ned for oppdimensjonering av overvatn gjennom fylkesvegen, i tråd med krava for nye utbyggingsplanar. På lengre sikt skal bekken opnast opp og førast til sjøen, noko som vil sikra trygge flaumsikringar. Dette viser at godt samarbeid gjev gode løysingar, skriv Kvam herad.
