Vil droppa dugnad for tur

Det vart klart då utval for kultur og levekår i Ullensvang drøfta saka tysdag 29. oktober. Sp tok vel å merka til orde for at kommunen bør betala halve kostnaden på to millionar kroner, men framlegget vart nedstemt med ni mot fire røyster.

Per Helge Sekse (Sp) viste til at skulane Kinsarvik, Hauso og Jondal har lukkast med å skaffa pengar med dugnadsinnsats i mange år. Han meiner at også oddingane i det minste bør prøva det å ha eit felles prosjekt å finansiera.

– Det er samlande. Dei har ei bra oppskrift. Det er lov å tenkja at det kanskje er greitt at det skal vera ein viss eigeninnsats i Ullensvang òg, og at ikkje kommunen skal betala alt, sa Sekse.

Les også:

– Vert vanskeleg

Nils Petter Freim (H), som sjølv har vore med som skuleleiar på skuleturar til konsentrasjonsleirane i Polen, meiner det kan verta vanskeleg å skaffa så mykje som éin million kroner med dugnadsarbeid. Særleg på store skular med mange elevar.

– Med ein så viktig tur er fullfinansiering det rette, sa han.

Mari Svartveit Hansen (SV) er samd. Ho støttar seg til Statsforvaltaren si fråsegn i saka. Ho påpeika at kapasiteten til dugnadsarbeid er ulik blant foreldra på dei ulike skulane.

Sekse meiner folk må yta noko og kunna forventa det av einannan.

– Eg synest ikkje synd i nokon om dei må samla nokre sekker med tomflasker eller selja dopapir. Eg synest tvert om at det bør opplevast som godt å vera med og dra eit felles lass, sa han.

Fyrst til neste år

Sp tok fyrst til orde for å venta med ordninga til skuleåret 2026–2027. Bakgrunnen er innspel frå skular som allereie har planlagt andre alternativ enn reisa til Polen.

Toralv Mikkelsen (Ap) fekk fleirtal for ein gyllen middelveg i form av neste skuleår, sjølv om det ifylgje rådmannen hadde lata seg gjera å byrja med turane allereie i inneverande skuleår.

Rådmannen, som har endra syn sidan sist saka vart drøfta i juni, påpeika at det ikkje er lovleg å påleggja dugnadsarbeid for å finansiera aktivitetar i skuletida. Frivillig dugnad er mogeleg, men det vil skapa ulik praksis og skapa ulikt press frå skule til skule, ifylgje sakspapira.

Den tilrådde ordninga inneber at skulane gjennom elevbedrifter i Ungt entreprenørskap kan skaffa pengar til dømes til måltid og sosiale aktivitetar på turane. Men dei to millionar kronene til mellom anna reise og løn må kommunen finansiera gjennom dei årlege budsjetta. Reisa skal ikkje gå ut over andre felt på skulane, forsikra rådmannen i møtet.

Kommunestyret avgjer saka 13. november.

Les også: