Vil drøfta tiltak etter nytt trafikkaos

Måndag ettermiddag førte ein stein på E16 til at vegen vart stengd i bortimot fem timar. Omkøyringsvegar var fylkesveg 49 og 79 langs Hardangerfjorden frå Ålvik til Granvin.

Smale parti og store køyretøy viste seg nok ein gong å vera ein dårleg kombinasjon. Resultatet vart stor trafikk og kork, særleg på strekninga Ålvik–Granvin. Trafikkdirigentane kom seint fram, truleg av di også dei stod i kø, skriv Bergens Tidende. Avisa skriv at to trailersjåførar tok ansvar og byrja dirigera trafikken.

Nygård krev no handling. Den fungerande ordføraren viser til at det så seint som fredag før pinse var liknande tilstandar. Han minner om at vegen langs fjorden er sjukehusvegen til kvemmingane, og at køane kan skapa vanskar for utrykkingskøyretøy.

Ynskjer drøfting

Han bad tysdag morgon om at fylkeskommunen og vegvesenet snarast tek initiativ til eit møte med både Voss og Kvam herad om saka.

– Ein har i praksis ikkje nokon omkøyringsveg om ein ikkje tek grep, seier han.

Nygård seier til HF at det er mykje trafikk på E16 året nær sagt året rundt. Risikoen for at vegen vert stengd på dagar med stor trafikk, og for at Hardangerfjorden i praksis vert stengd i periodar på nordsida, er såleis stor, meiner han.

– Kva meiner du er løysinga?

– Ein må i alle fall ha ei risikovurdering av kva konsekvensar det har å varsla omkøyring, seier Nygård, som lurar på i kvar grad geologar raskt kan koma og vurdera stoda i samband med skred og ta avgjerder.

Han meiner det i seg sjølv inneber ein stor risiko å fylla vegen langs fjorden med stilleståande trafikk. I stor grad er det rasutsette strekningar til dømes frå Kvanndal til Granvin, påpeikar han.

Sjølv møtte han den store trafikken på Kvamskogen måndag, og forstod raskt kva som var i vente. Han fortel at han snakka med ein som hadde bruka tre timar på å koma seg til sjukehuset på Voss.

Les også:

– Me ser på det

Rune Sverre Sande er fungerande seksjonssjef for vedlikehald, drift og beredskap i avdeling for infrastruktur og veg i Vestland fylkeskommune. Han har arbeidsstad i Nordfjord og kjenner såleis ikkje situasjonen i Hardanger godt, men var involvert i diskusjonar om stenginga mellom fylkeskommunen og Statens vegvesen måndag. Det er god dialog mellom vegeigaren og driftsansvarleg i slike situasjonar, forsikrar han.

Han vedgår at det er problematisk at smale vegar kan føra til at det tek tid før trafikkdirigentane kjem seg til rett stad. Særleg gjeld det om sommaren, då trafikken er stor og færre er på arbeid og tilgjengelege. Dirigentane er i tillegg gjerne ikkje godt kjende i området.

– Me ser på dette for å verta betre. Ein kan ikkje senda ut gud og kvarmann, for ein må ha kurs og opplæring i å styra trafikk

– Korleis ser de på at sivile grip inn og dirigerer?

– Me kan ikkje gå god for ei slik løysing, for kven er ansvarleg om noko skulle skje? seier Sande.

– Etter ferien

Han opplyser at sentrale leiarar på samferdslefeltet er på ferie. Om det skal vera noko poeng i eit møte for å drøfta saka, bør det truleg venta til etter sommaren, meiner Sande.

– Kva gjer ein om det oppstår ein naudsituasjon med kø på båe sider?

– Det er eit godt spørsmål. Dette er slikt ein kan oppleva på mange smale fylkesvegar. Det vert fleire og fleire «turistpunkt» og cruisebåtar, så det korkar seg fort. Det er eit stort tema som må vurderast for kvar strekning. Eg kan ikkje her og no svara veldig utfyllande på kva som vert gjort framover, seier Sande.

Det tok tid før geologen kom til skredstaden mellom to tunnelar på E16. Sande fortel at det sit geologar i beredskap døgeret rundt, men ikkje spreidde over heile fylket. I nokre tilfelle er det enkelt og greitt å opna vegen, medan ein i andre tilfelle må skaffa seg oversyn med drone eller helikopter. Då vil det ta meir tid. Tryggleiken går uansett fyrst, understrekar han.

Ikkje noko varsel

Korkje fungerande ordførar, ordførar Torgeir Næss (Ap), rådmann Anita Hesthamar eller Kvam brann og redning fekk varsel om at hardangervegen brått vart omkøyringsveg igjen måndag. Nokre av dei fekk med seg hendinga via media. Næss og Hesthamar fortel at dei i samtalar tidlegare har bede om å få slikt varsel.

Svein Valland Laupsa, leiar for førebygging i Kvam brann og redning, var mellom dei som fekk skredet med seg utan varsling. I slike tilfelle gjer ikkje tenesta konkrete tiltak, men har i tankane at det kan verta problematisk å koma seg fram. Er det kø, vil det ta tid å organisera klar bane for utrykkingskøyretøya. Det kan verta utfordrande, påpeikar han.

Mest utsett med tanke på beredskap, seier Næss, er kanskje Ålvik. Bygda har smale vegparti på båe sider og hyser dessutan eit stort smelteverk. Og medan folk i Norheimsund og Øystese relativt greitt kan koma seg til sjukehus i Bergen sjølv om trafikken på fylkesvegane våre er stor, er stoda ei anna i indre delar av Kvam.

Næss meiner det burde koma på plass ei ordning med trafikkdirigentar som var geografisk nærare, til dømes på Voss eller i Norheimsund, og som difor kunne ha kome seg på plass før køane oppstår.