Vil dela kunnskap om byggjetiltak
Austevoll kommune har invitert andre kommunar i Vestland til eit samarbeidsprosjekt for å fylgja opp ulovlege tiltak etter plan- og bygningslova.
Prosjektet har fått namnet Alle er like for lova, og det er bede inn til eit digitalt informasjonsmøte 8. september.
Prosjektet er retta mot kommunar som ynskjer å byrja med eit meir systematisk arbeid med å fylgja opp ulovlege tiltak men også kommunar som ynskjer å delta i eit større nettverk for å utveksla erfaringar og dela kompetanse på feltet.
Austevoll kommune har i to år prioritert og nytta ekstra ressursar på tilsyn med moglege brot på lova. Kommunen veit difor at det kan vera ressurskrevjande å starta eit systematisk arbeid med oppfylging av ulovlege byggjetiltak. Ein ynskjer difor å dela kunnskapen med ti andre kommunar.
Det kortsiktige målet er å senka terskelen for å fylgja opp denne typen saker, og gje kommunar motivasjon og verktøy til å koma i gang med eiga oppfylging. Det langsiktige målet er å etablera eit større fagmiljø på tvers av kommunegrensene. Mange av kommunane i fylket har dei same problemstillingane knytte til ulovleg bygging i strandsona eller i LNFR-område (landbruks-, natur-, frilufts- og reindriftsområde). Ein kan difor dra nytte av felles erfaringar og dela kompetanse om korleis saker best kan verta handtert.
Prosjektet vil verta leia av ein jurist frå Austevoll kommune og av Statsforvaltaren i Vestland.
