– Vil byggja ut breiband
Ullensvang kommune har søkt Vestland fylkeskommune om tilskot til breibandsutbygging.
Fylkeskommunen lyser ut pengar til utbygging av breiband i fylket. I søknaden, som vart send i byrjinga av mai, skriv kommunen at området det gjeld, ligg langs fylkesveg 5099 gjennom Hammaren på Kysnesstrand. Om lag 14 bustader eller næringslokale ligg i området.
Innbyggjarar i området bad tidlegare i vår kommunen om å søkja. På Hammaren er det i dag trådlaust breiband, med kapasitet opp til 50 megabit per sekund. Dette kan opplevast for lite, og nettet er til tider ustabilt, har fleire innbyggjarar opplyst til kommunen.
Kommunestyret i Ullensvang har samla løyvt 2.000.000 kroner til ulike prosjekt i kommunen øyremerkt ordninga. I kostnadsplanen for Hammaren-området vil kommunen spytta inn 100.000 kroner sjølv, og søkjer fylkeskommunen om tilsvarande sum. Dei resterande 200.000 kronene i kostnader må utbyggjaren dekkja.
