Vil byggja saman Sjusete og Kvamskogen
Henrik Steine, leiar i Kvamskogen Næringslag, fortel at hans inntrykk er at aktiviteten på Kvamskogen har stagnert.
– Det er ikkje sal av hyttetomter og det vert bygd få nye hytter. Det er det same over heile landet. Når inflasjon og høge renter gjer at folk får dårlegare råd, er det første folk vel bort hytter, dyre bilar og andre ting dei eigentleg ikkje treng, seier han.
Han ser ikkje bort frå at trenden kjem til å snu.
– Det har vore slik før og då har det snudd. Eg trur det kjem til å snu denne gongen òg, seier han.
Ein ny kommunedelplan for Kvamskogen er på veg. Steine er usikker på om den nye planen vil bety så mykje for utviklinga.
– Eg har ikkje store forventningar. Eg er usikker på om ein ny kommunedelplan vil fjerna det mykje omtala rekkjefølgekravet. Det er 12 år sidan den førre planen og kravet er der framleis. Rekkjefølgekravet må vekk. Det er plass til meir folk på Kvamskogen, seier han.
– Bør det leggjast til rette for nye hyttefelt?
– Dei som har klare hytteplanar, bør i alle fall få byggja sine hytter. Hadde eg fått bestemma, ville eg bygd veg til Sjusete og laga hyttefelt på heile området. Det er eit fantastisk område for fjellhytter. Men eg får neppe oppleva at dette skjer, seier han.
