Vil byggja på Blekeld
Øystese Jeger- og Fiskarlag ynskjer å setja opp eit grindbygg og ei reiskapsbu på Blekeld i Fitjadalen.
Det kjem fram i nabovarselet.
Dei torvtekte bygga vil koma i tillegg til det eksisterande grindbygget og toalettanlegget på staden. Det nye bygget skal innreiast med benker, bord og peis.
Laget vil òg leggja ned tilpassa betongelement i samband med eit turpadleanlegg og ein slipp.
– Dette vil gje auka moglegheiter for funksjonshemma til å koma seg ut for å fiska, ved at me lagar ei universell utforming som gjer det mogleg med bruk av rullestol i båt, skriv leiar Cato Landsvik.
Reiskapsbua skal brukast til oppbevaring av garn, anna utstyr og utstyr for funksjonshemma.
Laget vil ha eit gruslagt område med båtopptrekk, benker og bord, og vil laga til for utleigebåtar som i dag ligg der den nye slippen ligg.
Laget har søkt om dispensasjon frå byggjegrensa langs vassdrag.
Søkjaren fekk i 2020 lengd ein leigeavtale om området Blekeld med Kvam herad for 30 nye år.
Blekeld er base for kultiveringsarbeid som skal sikra ei god fiskestamme i Fitjadalsvatnet.
