Vil byggja ny og større flytebryggje

Hillersvika Hyttelag står bak prosjektet. Målet er å erstatta ei bryggje som allereie finst på staden. Ifølgje søknaden til Kvam herad vert den planlagde bryggja ei betongbryggje med 13 båtplassar på innsida. Bryggja vert meir robust og får plass til fleire båtar enn den som allereie ligg der. Målet er å sikra båtplassane mot dårleg vêr, gjera tilkomsten til sjøen tryggare og sørgja for at alle medlemmene i hyttelaget får båtplass.

Plasseringa er i eit område som er regulert som friluftsområde i kommuneplanen sin arealdel for 2019 til 2030. Difor trengst det ein dispensasjon frå den gjeldande planen.

Kvam herad sende byggjesøknaden på høyring 6. februar. Heradet har fått uttalar frå Fiskeridirektoratet, Kystverket og Vestland fylkeskommune. Ingen av dei to første hadde innvendingar.

Fylkeskommunen skriv at ei ny bryggje truleg vil føra til meir trafikk i avkøyrsla til fylkesveg 48. Før heradet kan gje løyve, må det liggja føre eit løyve til utvida bruk av avkøyrsla. Fylket vil truleg krevja både utbetring av rekkverket og sikta.

Sidan tiltaket er i konflikt med kommuneplanen, trengst ei politisk handsaming, skriv Kvam herad i eit brev til hyttelaget.