Vil bruka fem millionar på å oppgradera uteområdet

Det kjem fram i forslaget frå rådmannen til neste års budsjett for Ullensvang kommune, som vart presentert i eit digitalt møte for kommunestyre medan regnet hølja ned torsdag ettermiddag..

Uteområdet ved skulen har også tidlegare fått løyvingar til oppgradering, men førebels har ingenting skjedd i felten. I budsjettet for 2023 blei det sett av 2,5 millionar til same føremål, og 5 millionar i 2024. I 2025 får skulen altså 5 millionar nok ein gong.

Bygda kan også gleda seg over at Ullensvang kommune vil flytta ein traktor frå Odda til Jondal. Denne skal nyttast til vedlikehald av veg.

Rådmannen tek til orde for også å selja det gamle rådhuset i Jondal, på folkemunne kalla Blåhuset, for å spara 250.000 kroner i året frå og med 2026.

Vil leggje ned fleire skular

Elles var omstilling det viktigaste ordet då kommuneadministrasjonen i Ullensvang la fram sitt forslag til budsjett og økonomiplan.

Kommunen slit med å tiltrekka seg nok fagfolk i dei fleste sektorar. Og pensjonistar vert fleire og fleire.

Oppvekstsjef Anna Marie Kråkevik presenterte oppvekstdelen av budsjettet.

– Me har vanskar lokalt med å bemanna skular og halda eit stabilt fagleg miljø over tid, sa ho.

Det vil bli færre elevar og færre lærarar dei neste åra. Derfor foreslår oppvekstetaten i kommunen følgjande tiltak:

• Legga ned Tyssedal og Skare barneskule hausten 2025

• Legga ned Hauso skule hausten 2026

• Legga ned Utne og Aga barnehage i 2027. Desse barnehagane skal flytta inn i det som var Hauso skule.

Fleire vanskelege spørsmål

Den økonomiske ramma for neste års budsjett er på 2,2 milliardar kroner. Rådmannen ser føre seg å bruka rundt 1,8 milliardar på drift. I tillegg vil han investera for 433 millionar.

Kommunen har framleis solid økonomi, kom det fram i presentasjonen, men ein må likevel ta grep. Kommunen skal kutta totalt 50 millionar i driftsbudsjettet dei neste tre åra.

Forutan omorganisering i skule- og barnehagesektoren blir det foreslått fleire sparetiltak.

Dette er nokre av dei:

• Legga ned kjøkkendrift i enkelte institusjonar

• Mindre leige av eksterne bustadar, og meir bruk av kommunale bustadar

• Sal av Blåhuset i Jondal og arkivhuset i Vik

• Mindre bruk av konsulentar i kommunen

• Gå gjennom kostnadar med administrative oppgåver

Kommunen vil også skifta ut tenestebilane med elbilar, for å spara drivstoff over tid.

– Det er fleire spørsmål om framtida til kommunen det er vanskeleg å svara på no, sa rådmann Ole Jørgen Jondahl i innleiinga.

– Vil rekrutteringa til kommunen betra seg? Klarar me å behalda dei arbeidarane som me allereie har? spurde han retorisk.

Jondahl understreka også at den høge renta er framleis ei utfordring, i Ullensvang som elles i Noreg.

Formannskapet skal behandla administrasjonen sitt budsjettforslag 20. november, før det skal ut på høyring. Kommunestyret vedtek budsjettet 18. desember.