Vil brenna hus i Ålvik

Det kjem fram i ein søknad om riving frå Kvam herad til Kvam herad.

Bustaden vart kjøpt av heradet i 2019, og er ynskt fjerna for å gje plass til gang- og sykkelveg. Då huset var kjøpt, vart det sett i gang regulering, og ei reguleringsendring vart vedteken av miljø-, plan- og bygningsutvalet i juni.

– Kvam brann og redning har stor trong for øving på realistiske scenario ved bustadbrann. Det er difor ynske om å nytta bygget som øvingsobjekt, skriv heradet i søknaden.

Rådmannen har gjeve løyve til riving ved kontrollert brenning på vilkår av at bygget fyrst vert ribba for helse- og miljøfarlege stoff, og at avfallet etter brannen vert levert til godkjent avfallsmottak.

Bustaden er frå 1958, og består av kjellar, hovudetasje og kaldt loft. Bruttoarealet er på om lag 350 kvadratmeter.